Сайлау учаскесінің ұйымдастырушылары ардагер анамызға құрмет көрсетіп, сыйлық ұсынды, деп хабарлайды aqshamnews.kz тілшісі.
Алатау ауданындағы №196 жалпы білім беретін мектепте орналасқан №636 сайлау учаскесінде Желтоқсан оқиғасының қатысушысы, ардагер Қалдыгүл Бейсембиева өз таңдауын жасап, дауыс берді.
Ел болашағына бейжай қарамайтын ардагер ана келешек ұрпаққа ақ тілегін арнап:
– Келешек ұрпақ өсіп-өніп, «әр қазақ - менің бауырым» деген бауырмалдық пен бірлік берік болсын. Баршаңызға жұмыстарыңызға сәттілік, еңбектеріңізге жемісті тілеймін. Еліміз аман, жұртымыз тыныш болсын, – деген жүрекжарды лебізін білдірді.
Сайлау учаскесінің ұйымдастырушылары азаматтық ұстанымына деген ризашылықтың белгісі ретінде ардагер анамызға құрмет көрсетіп, сыйлық ұсынды.
№636 сайлау учаскесінде ерекше көңіл-күй қалыптасқан. Ауладан әсем әуен әуелеп, маңызды қоғамдық шараға тән көтеріңкі әрі жылы атмосфера сезіліп тұр. Бұл көрініс тұрғындарға ерекше әсер сыйлауда.