Байқауға барлығы 203 өтінім келіп түскен, деп хабарлайды aqshamnews.kz тілшісі.
Алматы тұрғындары 11 тамыздан бастап Қазақстанда алғаш рет жүзеге асырылып отырған «Жастар қатысатын бюджет» жобасы аясында ұсынылған жобаларға дауыс бере алады. Дауыс беру қорытындысы бойынша қаржыландырылып, қалада жүзеге асырылатын бастамалар анықталады. Бұл туралы Алматы Жастар саясаты басқармасының өкілдері хабарлады.
Байқауға барлығы 203 өтінім келіп түскен. Алдын ала іріктеу мен сараптамалық бағалаудан кейін дауыс беруге 122 жоба жіберілді.
Бастамалардың дені әлеуметтік салаға қатысты — 35 жоба. IT және цифрландыру бағытында — 30, білім беру саласында — 21 жоба ұсынылған. Сонымен қатар дауыс беруге мәдениет, экология, денсаулық сақтау, спорт және инфрақұрылым бағыттарындағы жобалар да шығарылды.
«Біз алғаш рет жастар қоғамдық өмірдің жай ғана қатысушысы емес, қаладағы өзгерістердің толыққанды авторы болатын жүйе құрып отырмыз. Байқауға ұсынылған әр идея — жас алматылықтардың қаланы дамытуға қосқан үлесі. Енді қандай жобалар бірінші кезекте жүзеге асатынын тұрғындардың өздері анықтайды. Мұндай тәсіл жауапкершілік, сенім және шешімдерді бірлесіп қабылдау мәдениетін қалыптастырады», — деді «Жастар қатысатын бюджет» жобасының жетекшісі Самархан Әбдуғалиев.
Жоба жас алматылықтарға қалалық ортаны дамыту бойынша идеясын ұсынуға және бюджет қаражаты есебінен жүзеге асырылатын бастамаларды таңдауға қатысуға мүмкіндік береді.
Онлайн дауыс беру 18 тамызға дейін жалғасады. Тұрғындардың ең көп қолдауына ие болған жобалар жеңімпаз атанады.