Бүгін Қазақстанда конституцияның жаңартылған редакциясы күшіне енді. Алматыдағы бала құқығын қорғау басқармасының басшысы Жанат Айтпаеваның айтуынша, жаңартылған негізгі заң балалардың құқығын қорғау кепілдігін күшейтіп, олардың қауіпсіз әрі жан-жақты дамуына берік негіз қалыптастырады, – деп хабарлайды aqshamnews.kz тілшісі.
Өңірлік коммуникациялар қызметіне берген сұқбатында Жанат Айтпаева атап өткендей, бала – елдің басты байлығы, олардың мүддесін қорғау – мемлекеттің негізгі басымдықтарының бірі. Жаңартылған конституцияда отбасыны, ана мен әке болуды және балалық шақты мемлекеттік қорғауды қамтамасыз ететін норма бекітілген. Сондай-ақ әр баланың білім алуға, дамып, лайықты өмір сүруге құқығы айқын көрсетілген.
Оның айтуынша, конституциялық кепілдік қолданыстағы заңнамамен толықтырылады. Олардың қатарында Қазақстан Республикасының «Бала құқықтары туралы» заңы мен «Неке (ерлі-зайыптылық) және отбасы туралы» кодексі бар. Бұл құжаттар балалардың әлеуметтік қорғалуын, денсаулық сақтау құқығын, отбасында өмір сүруі мен қауіпсіздігін қамтамасыз етеді.
Басқарма басшысы 2026 жылдың қаңтарында қабылданған 2026–2030 жылдарға арналған «Қазақстан балалары» жаңа тұжырымдамасына ерекше тоқталды. Бұл құжат балаға кешенді қолдау көрсетудің бірыңғай моделін енгізуді, отбасындағы қолайсыз жағдайларды ерте анықтауды, тұрмыстық зорлық-зомбылық пен буллингтің алдын алуды, сондай-ақ балаларды цифрлық қауіптерден қорғауды көздейді.
«Біз әр баланың өмірін әділетті, қауіпсіз әрі мүмкіндікке толы етуге ұмтыламыз. Әр бала пікір білдіруге, сапалы білім алып, армандауға құқылы», — дейді Жанат Айтпаева.
Мамандардың пікірінше, жаңартылған конституцияның күшіне енуі балалардың құқығын қорғау жүйесін одан әрі нығайтып, Қазақстанда дені сау, білімді әрі әлеуметтік тұрғыдан қорғалған ұрпақ тәрбиелеуге жағдай жасайтын маңызды қадам болмақ.