Алматы қаласында көші-қон заңнамасын бұзу фактілерін анықтау және алдын алу мақсатында көші-қон қызметі жүйелі түрде рейдтік іс-шаралар өткізуде.
Өткен тәулікте Түрксіб ауданындағы құрылыс нысандарының бірінде жүргізілген тексеру барысында елімізде заңсыз еңбек қызметімен айналысып жүрген 22 шетел азаматы анықталды, деп хабарлайды aqshamnews.kz Polisia.kz-ке сілтеме жасап.
Олардың 9-ына тиісті рұқсатсыз немесе виза мен құжатта көрсетілген мақсатына сәйкес келмейтін жұмыс атқарғаны үшін әкімшілік хаттамалар толтырылды. Ал қалған 13 шетелдікке профилактикалық сипаттағы шаралар қолданылып, барлығы Алматы қаласы Полиция департаментінің қабылдау-тарату орнына орналастырылды. Қазіргі таңда заң талаптарын бұза отырып шетелдік жұмыс күшін пайдаланған жұмыс берушілерді жауапкершілікке тарту бойынша тиісті шаралар қабылданып жатыр. Осыған ұқсас тексеру Алатау ауданында да жүргізіліп, ғимараттарды жөндеумен айналысып жүрген тағы 9 шетелдік азамат анықталды. Сонымен қатар Наурызбай ауданында жоспарлы іс-шаралар аясында шетелдіктердің уақытша және тұрақты мекенжайлары, сондай-ақ құрылыс нысандары тексерілді. Нәтижесінде жеке басын куәландыратын құжатсыз жүрген 10 азамат анықталып, тиісті рәсімдеу жұмыстары жүргізілді.
– Біз көші-қон заңнамасын бұзуға қатысты деректерді анықтау және алдын алу бойынша жұмысымызды жүйелі түрде жалғастырып келеміз. Әсіресе, құрылыс алаңдарында тіркеусіз тұрып, рұқсатсыз еңбек ететін шетелдіктерге ерекше назар аударамыз. Әрбір анықталған құқық бұзушылық бойынша заң аясында нақты шаралар қабылданады. Біздің негізгі мақсатымыз – қаламыздағы қоғамдық тәртіп пен қауіпсіздікті қамтамасыз ету, – деді Алматы қалалық полиция департаменті көші-қон қызметі басқармасының бастығы Еркін Амантаев.