Алматы қаласында полиция қызметкерлері заңсыз көші-қонды ұйымдастыруға және шетелдік жұмыс күшін заң талаптарын бұза отырып тартуға байланысты құқыққа қайшы әрекеттердің жолын кесті, – деп хабарлайды aqshamnews.kz тілшісі Polisia.kz-ке сілтеме жасап.
Жүргізілген іс-шаралар барысында тиісті рұқсат құжаттарынсыз еңбек қызметін жүзеге асырған шетел азаматтары анықталды. Олардың қала аумағындағы нысандардың бірінде заң талаптарын сақтамағаны әрі жұмыс істегені белгілі болды. Барлық тұлға мән-жайды анықтау үшін полиция бөлімшесіне жеткізілді. Алдын ала деректер бойынша, ұйымдастырушылар заңсыз көші-қон арнасын құрған болуы мүмкін. Осы фактіге қатысты материалдар тіркеліп, тиісті процессуалдық шешім қабылдау үшін сотқа жолданды. Қазір Алматы қаласында көші-қон заңнамасын бұзуды анықтау және тоқтату, сондай-ақ елде заңсыз жүрген шетел азаматтарын табу мақсатында "Мигрант" жедел-профилактикалық іс-шарасы өтіп жатыр.
– Заңсыз көші-қон фактілерін анықтау жұмыстары жүйелі түрде жүргізілуде. Басты мақсат – құқық бұзушылықтарды тоқтатумен қатар, заңсыз көші-қон арналарының алдын алу. Іс-шара аясында жұмыс берушілерге және шетел азаматтарының ықтимал тұру орындарына бақылау күшейтілді. Анықталған барлық құқық бұзушылық заң талаптарына сәйкес қатаң түрде тоқтатылады, – деп атап өтті Алматы қаласы ПД Түрксіб ауданы полиция басқармасының бастығы Думан Аухадиев.
Алматы қаласының полициясы көші-қон бақылауын қамтамасыз ету және қоғамдық тәртіпті нығайту бағытындағы кешенді жұмыстарды жалғастырады.