Жұмысшы мамандықтар жылы аясында Алматы қаласы Туризм және қонақжайлылық индустриясы колледжі базасында I республикалық «Ұлттық дәм» байқауы өтті.
Байқау-фестивальге әлеуметтік серіктестер, Алматы қаласы мен Алматы және Жамбыл облыстарының колледж студенттері, өндірістік оқыту шеберлері, оқытушылар қатысты. Байқауға 60-қа жуық қатысушы жиналды, ал «дәмді» іс-шараны 50-ден астам қонақ тамашалады.
Туризм және қонақжайлылық индустриясы колледжінің директоры, байқау ұйымдастырушыларының бірі Н.Жабықбаев іс-шараның маңыздылығын атап өтті.
«Фестивальдің мақсаты – аспаздық өнер саласындағы жұмысшы мамандықтарды насихаттау, қазақ ұлттық тағам дәстүрлерін жаңғырту мен сақтау, сондай-ақ аспаз мамандығының беделін арттырып, жастардың шығармашылық әлеуетін дамыту», – деді ол.
Иә, қазақтың ұлттық асханасының ғасырлар бойы қалыптасқан дәстүрін сақтау және кеңінен насихаттау, ұмыт қалған тағам түрлерін қайта жаңғыртуда мақсат еткен фестивальде қатысушылар «әсіп», «жанышпа», «ми шұжық», «құйрық бауыр», «жент», «балқаймақ», «уыз», «құймақ» сынды ұмыт бола бастаған тағамдарды жаңаша түрде ұсынуға тырысты. Байқау сонымен қатар қазақ тағамын туристер арасында кеңінен танытуға, оны мейрамхана индустриясында ілгерілетуге және аспаздық өнер саласында озық тәжірибе алмасуға ықпал етті.
«Біз – өндірістік оқыту шеберлерінің командасы, Жамбыл облысынан келдік. Дайындық барысында ұлттық дәстүрімізді зерттеп, мейрамхана мәзіріне енгізуге болатын, заманауи үлгіде дайындалған тағамдар әзірледік. Бұл тағамдар тек отандастарымызға ғана емес, сонымен қатар еліміздің қонақтары мен туристеріне де ұнайды деп ойлаймыз», – дейді Тараз сервис және технология колледжінің оқытушысы М.Құрманалиева.
«Жанданған ұлттық дәм» номинациясының бас жүлдесін Алматы қаласы Туризм және қонақжайлылық индустриясы колледжі иеленді. 1-орын – Алматы технологиялық-қаржылық және инновациялық-технологиялық колледжіне, 2-орын – Алматы технологиялық колледжі мен Тараз (Жамбыл облысы) сервис және технология колледжіне, ал 3-орын Жамбыл кәсіптік колледжі мен Қаскелең кәсіптік-техникалық колледжіне (Алматы облысы) бұйырды.
Байқау жеңімпаздары дипломдармен және бағалы сыйлықтармен марапатталды.