Алматыда учаскелік полиция инспекторы Әлішер Болатханов Мұратбаева көшесіндегі үйлердің бірінде тұратын егде жастағы әйелдің бірнеше күн бойы пәтерінен шықпай, телефон қоңырауларына жауап бермей жатқанын байқап, жедел әрекет етті.
Үй-үйді аралау барысында бұл жағдайға куә болған инспектор әйелдің жалғыз тұратынын ескеріп, дереу дабыл қақты.
Қажетті қызметтерге хабарласып, есікті ашуға шара қолданылды. Пәтерге кірген кезде 86 жастағы әйел жатын бөлмеде еденде жатқан, есін білгенімен қозғала алмайтын жағдайда болған. Оған жедел медициналық көмек көрсетілді.
Әйел бірнеше күн бұрын өзін нашар сезініп, құлап қалғаны белгілі болды. Алмалы аудандық полиция басқармасының бастығы Олжас Шәріпов учаскелік инспектордың жедел әрекеті арқасында әйелдің өмірі мен денсаулығына төнген қауіптің алдын алғанын атап өтті. Қазір әйел дәрігерлердің бақылауында, ауруханаға жатқызылды.