Алматыда туберкулезге қарсы күрес қарқынды жалғасуда, бұл іске үкіметтік емес ұйымдар (ҮЕҰ) айтарлықтай үлес қосуда. «Мейірімді жол» қоғамдық қоры бірнеше жылдан бері туберкулезбен ауыратын науқастарға жан-жақты қолдау көрсетіп, тек емдеуге ғана емес, әлеуметтік мәселелерді шешуге де көмектесуде. Бұл туралы өңірлік коммуникациялар қызметінде өткен баспасөз конференциясында қордың жоба жетекшісі Мадияр Абдилов мәлімдеді, деп хабарлайды aqshamnews.kz
«Өткен жылы біз негізгі халық топтарынан 530 адамды тексерістен өткізіп, олардың 87-сінен туберкулез анықтадық. Ауруды ерте анықтау ғана емес, оны уақытылы емдеу де аса маңызды. 2024 жылы біз бұрын емін тоқтатқан 22 науқасқа қайтадан медициналық көмек бердік», – деп мәлімдеді спикер.
Оның айтуынша, қордың басты бағыттарының бірі – науқастарды әлеуметтік қолдау. 2024 жылы 66 тұрғылықты жері жоқ адам емханаға тіркелсе, 152 пациент ресми тіркеуге қойылды, ал туберкулезден зардап шеккен 82 отбасы дағдарыс орталықтарына жіберілді.
Сонымен қатар, жұмысқа орналастыру мен әлеуметтік қолдау алуға көмектесу шаралары да ұйымдастырылды. Нәтижесінде 72 пациент Жұмыспен қамту орталығына кезекке қойылып, амбулаторлық ем қабылдап жүрген 128 науқас азық-түлік себеттерін алды, ал 160 адамға көлік карталары берілді. Бұдан бөлек, білім беру тренингтері, заңгерлік кеңестер мен мәдени-демалыс шаралары ұйымдастырылды.
«Туберкулезге қарсы кешенді шаралар, оның ішінде медициналық, әлеуметтік және психологиялық қолдау нақты нәтижелер беруде. Бұл процесте ҮЕҰ-лар маңызды рөл атқарады, олар науқастарға тек ауруды жеңуді ғана емес, сонымен қатар өмірлік қиындықтарды еңсеруге көмектеседі», – деп түйіндеді Мадияр Абдилов.
Спикердің айтуынша, мемлекет пен қоғамдық ұйымдардың бірлескен жұмысының арқасында Алматыда туберкулездің алдын алу, ерте диагностика жасау және оны тиімді емдеу үшін барлық қолайлы жағдайлар жасалуда