Алматы қаласы бойынша Ұлттық қауіпсіздік комитеті Департаменті терроризмнің алдын алу және террористік сипаттағы құқықбұзушылықтардың жолын кесу мақсатында арнайы ақпараттық-насихаттық бейнеролик дайындады. Аталған жұмыс терроризмге қарсы күрес жөніндегі қалалық жедел штаб аясында жүзеге асырылды.
Бейнероликтің негізгі мақсаты – тұрғындарға, әсіресе білім алушыларға террористік қауіп-қатер туындаған жағдайда дұрыс әрекет ету тәртібін түсіндіру, сондай-ақ терроризм актісі туралы көрінеу жалған хабарламалардың құқықтық салдары жөнінде ақпарат беру. Онда жарылғыш құрылғы қойылғаны туралы анонимді хабарламалар мен қоңыраулардың заң алдында жауапкершілікке әкелетіні нақты көрсетілген.
Көрсетілім барысында Қазақстан Республикасы Қылмыстық кодексінің 273-бабына сәйкес терроризм актісі туралы көрінеу жалған хабарлама бергені үшін бас бостандығынан айыруға дейінгі жаза қарастырылатыны түсіндірілді. Сонымен қатар Қылмыстық кодекстің 15-бабына сәйкес мұндай құқықбұзушылық үшін 14 жасқа толған тұлғалар қылмыстық жауапкершілікке тартылатыны атап өтілді.
Мамандар мұндай ақпараттық жұмыстар қоғамда құқықтық сауаттылықты арттыруға және қауіпсіздік мәдениетін қалыптастыруға ықпал ететінін атап өтті.