10-12 қазан аралығында Алматы қаласында жол-көлік оқиғаларының, жолаушылар тасымалы саласындағы құқық бұзушылықтардың жолын кесу және олардың алдын алу мақсатында "Тасымалдаушы" жедел-профилактикалық іс-шара өткізіледі, - деп хабарлайды Aqshamnews.kz.
Іс-шараның басты мақсаты – заңсыз тасымалдаушыларды анықтау, жолдардағы қауіпсіздік пен заңдылықты қамтамасыз ету, сондай-ақ такси мен қалааралық тасымал қызметтерін пайдаланатын азаматтардың құқықтарын қорғау. Шараға көлік прокуратурасы, көлік бақылау инспекциясы, мемлекеттік кірістер органдары және "ҚазАвтоЖол ҰК" АҚ өкілдері тартылған. Бірлескен мобильді топтар қала көшелерінде және қаладан шығаберістерде рейдтік іс-шаралар өткізіп, автокөліктердің техникалық жай-күйін және рұқсат құжаттарының болуын тексеруде.
- Негізгі назар жолаушылар тасымалына аударылуда. Техникалық ақауы бар немесе қайта жабдықталған көліктердің пайдаланылуына жол бермеу, сондай-ақ заңсыз тасымалдаушыларды анықтау маңызды. Азаматтардың қауіпсіздігі мен заңның сақталуы – біздің басты басымдығымыз, – деді Алматы қаласы ПД жергілікті полиция қызметі басқармасы бастығының орынбасары Тимур Ноғайбаев.
Полиция заңсыз тасымалдаушылардың қызметін пайдаланудың жол-көлік оқиғалары қаупін арттыратынын және жолаушылардың өмірі мен денсаулығына қауіп төндіретінін еске салады. "Тасымалдаушы" жедел-профилактикалық іс-шарасы мемлекет Басшысы жариялаған "Заң және тәртіп" қағидатын іске асыру және "Профилактика жылы" аясында өткізіліп жатыр.
