Қанды оқиға 2015 жылы наурыз айында орын алған
Алматы полицейлері 8 жыл бұрынғы кісі өлтіру қылмысының бетін ашты, деп хабарлайды Almaty-akshamy.kz Zakon.kz-ке сілтеме жасап.
Қанды оқиға 2015 жылы наурыз айында орын алған. Жеке жүргізуші болып жұмыс істеген 60 жастағы С. есімді азаматтың мәйіті Алматының Түрксіб ауданында табылған болатын.
Сот-медициналық сараптама өлімнің тұншығудан болғанын анықтады.
"Сонымен қатар такси жүргізушісінің Nissan көлігінің жоғалғаны анықталды. Айтпақшы, үш еркекті қызықтырғаны сол көлік болатын. Күдіктілер қарақшалық тонау жасап, автокөлікті иемдену мақсатында кісі өлтіру әрекетін жасағанымен, көлікті иелік ете алмаған. Бірнеше күннен кейін көлік табылды", -дейді Алматы қалалық полиция департаменті бастығының орынбасары Дидар Аханов.
Қалалық криминалдық полиция басқармасының қызметкерлері жоғарыда аталған қылмысты жасаған 30 жастағы С. есімді азаматты, 26 жастағы С. есімді азаматты және 29 жастағы Б. есімді азаматты ұстады. Олар қамауға алынды.
ҚР ҚПК-нің 201-бабы және ҚР Конституциясының нормаларына сәйкес қылмыстың басқа да мән-жайлары жария етуге жатпайды.