Бүгін спортты дамытуға үлес қосып, халықаралық аренада жоғары нәтижеге қол жеткізген еңбек сіңірген жаттықтырушылар мен спортшыларға Алматы қаласы әкімінің Алғыс хаттары мен ақшалай сертификат табысталды, – деп хабарлайды aqshamnews.kz тілшісі.
Марапаттарды Алматы қаласы әкімінің орынбасары Нұрлан Әбдірахым табыстады. Ол қала мен Қазақстан атынан халықаралық аренада өнер көрсететін спортшылардың тұрақты түрде жоғары нәтиже көрсетіп келе жатқанын атап өтті.
«Осы жетістіктердің негізінде кәсіби еңбегі жатқан жаттықтырушылар мен мамандарға ерекше алғысымды білдіремін», — деді Нұрлан Әбдірахым.
Көп жылғы кәсіби еңбегі және қала спортының дамуына қосқан үлесі үшін Қазақстан Республикасының еңбек сіңірген жаттықтырушылары Қайрат Биекенов, Алексей Казаков, Неля Корниенко, Қайрат Қырғызбаев, сондай-ақ грек-рим күресінен жоғары санатты жаттықтырушы Саламат Сәрсебеков марапатталды.
Сонымен қатар халықаралық аренада Алматы мен Қазақстанның намысын абыроймен қорғаған спортшылар марапатқа ие болды. Элеонора Ибрагимова мен Мария Горун стендтік атудан командалық сайыста жасөспірімдер арасында әлем чемпионы атанды. Эвелина Ежова әйелдер арасындағы спорттық гимнастикадан Әлем кубогы кезеңінің алтын медалін иеленген Қазақстан тарихындағы тұңғыш спортшы атанса, Нұрмұхаммед Жайлыбай семсерлесуден жасөспірімдер арасындағы әлем чемпионатының қола жүлдесін жеңіп алған ел тарихындағы алғашқы спортшы болды.
Марапатталғандар қатарында ірі халықаралық жарыстардың жеңімпаздары мен жүлдегерлері Әлидар Абдукәрімов, Әділет Шері, Алдияр Жарас, Аманжол Зареров, Бақдаулет Мырзабеков, Мәди Жақып және Тұрар Дүйсехан да бар.
Алматы қаласының Спорт басқармасы өкілдерінің мәліметінше, марапаттау рәсімі Спорт күніне арналған іс-шаралардың жалғасы болды.