Алматыда бейнебақылау камерасын сындырған сотталғанға үкім шықты.
Алматыдағы тергеу изоляторында бейнебақылау камерасын қасақана сындырған сотталғанға қатысты Қылмыстық кодекске енгізілген жаңа бап бойынша үкім шықты, деп хабарлайды aqshamnews.kz Polisia.kz-ке сілтеме жасап.
Алматы қаласы бойынша ҚАЖД №72 мекемесінде отырған 21 жастағы М. Қылмыстық кодекстің 191-бабы бойынша сотталған болатын. Осы жылдың маусым айында М. жазасын өтейтін камерада бейнебақылаудың істен шыққаны анықталып, оқиға орнына Алматы қаласы Түрксіб аудандық полиция басқармасынан жедел тергеу тобы шақырылған еді. Тексеріс барысында бейнебақылау камерасын сотталған М. сындырғаны анықталды.
Бұған дейін Президенттің тапсырмасы бойынша Пенитенциарлық мекемелерде бейнекамераларды бүлдіргені үшін қылмыстық жауапкершілік енгізілген болатын. Жаңа бап бойынша алты айдан жеті жылға дейін бас бостандығынан айыру жазасы қарастырылған. Жуырда қылмыстық-атқару жүйесі департаментінің талап арызы бойынша сот болып, бұрын адам тонағаны үшін 3 жылға сотталған М. енді бейнебақылау камересын қасақана сындырғаны үшін бұрынғы жазасына тағы 1 жыл қосып алды.