Жасыл желектен жарық көрінеді: Алматыда ағаштармен көмкерілген көшелерді жарықтандыру жолы табылды
Алматыда биіктігі 4 метр болатын жаңа кронштейндер орнату басталды. Бұл шамдарды ағаштан жоғары орналастырып, көше бойын толық жарықпен қамтамасыз етуге мүмкіндік береді. Бұл туралы «Алматы Қала Жарық» МКК басшысы Игорь Мысик мәлімдеді, деп хабарлайды aqshamnews.kz
«Алматы өте жасыл қала, мұндағы ағаштардың көптігі – қаланың экожүйесінің бір бөлігі. Көптеген жасыл аймақтағы ағаштар жарық шамдарын көлеңкелеп қояды. Біз басқа мекемелермен бірлесіп, ағаштарды санитарлық тұрғыдан реттеп, енді 4 метрлік жаңа кронштейндер орнатып жатырмыз. Бұл биыл енгізілген жаңалықтың бірі», – деді ол.
Тіректердің биіктігі халықаралық стандартқа сай таңдалады: жолдар үшін 7-ден 12 метрге дейін, ал саябақтар мен скверлер үшін 3-тен 7 метрге дейін.
Сонымен қатар, тротуарды жарықтандырудың жаңа жүйесі енгізілуде. Алмалы ауданында ғана 300-ден астам кронштейн мен дәл сонша шам орнатылған. Қаланың әкімі Ерболат Досаевтың бастамасымен жаяу жүргіншілер өткелдеріне түнгі жарық орнату жұмыстары басталды.
«Кронштейндер жолдың үстіне орнатылып, тікелей жолдың ортасына қарай бағытталады және жарықты мол береді. Бұл шамдарды ағаштардың жапырағы көлеңкелемейді, осылайша жолдың жарық сапасы артады. Қазір мұндай кронштейндер Алматы орталығындағы бірнеше көшеге қойылды, алдағы уақытта оларды басқа ауданға да орнатамыз», – деді Игорь Мысик.
Айта кетейік, 2024 жылы Алматыда 25 мыңнан астам шам ауыстырылып, 250 шақырымнан астам кабель тартылды, 1800 тірек орнатылды. 5000-нан астам ескі шамдар энергия үнемдейтін жарықдиодты (LED) шамдарға ауыстырылды. Бұл шамдар жарығырақ, ұзақ қызмет етеді және әлдеқайда үнемді. Мұның бәрі 2024 жылдың қаңтарынан бастап жарықтандыруды қалпына келтіру бойынша атқарылып жатқан кешенді жұмыстың бір бөлігі. Бұл жұмыстар «Алматы Қала Жарық» МКК-ға өткеннен кейін қолға алынған, себебі бұрынғы жекеменшік консорциуммен келісімшарт бұзылған болатын.