Алматыда сауда және тұтынушылар құқығын қорғау департаментінің 2025 жылдың бірінші тоқсанындағы жұмысы қорытындыланды.
Осы кезеңде ведомство азаматтардың 2 мыңнан астам өтінішін қарап, 20 жоспардан тыс тексеру жүргізіп, тұтынушыларға 45 млн теңгеден астам қаржыны қайтарып берді, деп хабарлайды aqshamnews.kz.
Бұл туралы Алматы қаласы өңірлік коммуникациялар қызметінің баспасөз конференциясында департамент басшысының орынбасары Нурлан Абдиев хабарлады.
«Өтініштердің басым бөлігі бөлшек және электрондық сауда саласында келіп түседі. Сондай-ақ қоғамдық тамақтану саласында да шағымдар бар», - деді спикер.
Оның айтуынша, тексеру нәтижесінде үш айда 61 әкімшілік жаза қолданылған.
Негізгі бұзушылықтар тауарларды қайтарудан немесе айырбастаудан бас тартумен, шағымдарға уақтылы жауап бермеумен және баға саясатын бұзумен байланысты.
Сондай-ақ, Нурлан Абдиев департаменттің әлеуметтік маңызды азық-түлік тауарларына баға белгілеу мәселелерімен белсенді айналысатынын атап өтті. Осы жұмыс шеңберінде бірінші тоқсанда комиссияның 6 отырысы өткізіліп, онда 226 бұзушылық анықталып, жойылды. Жосықсыз кәсіпкерлерге қатысты 212 әкімшілік хаттама жасалды.
«Біз нарықты бақылауды, тұтынушылардың құқықтарын қорғауды және сауда және азаматтардың құқықтарын қорғау туралы заңдарды түсіндіруді жалғастырамыз», - деп баса айтты ол.
Тексерістерден басқа, ведомство БАҚ және әлеуметтік желілерде белсенді түсіндіру жұмыстарын жүргізеді, сондай-ақ халықтың құқықтық мәдениетін арттыру үшін қоғамдық ұйымдармен өзара іс-қимыл жасайды.