Көлік саласының сарапшысы Руслан Мухомедьяров Пушкин көшесінен Сейфуллин даңғылына дейінгі жобаны талқылау барысында құрылыс жұмыстарын осы күзде емес, келесі жылдың сәуір айында бастауды ұсынды. Сарапшының пікірінше, бұл көлік коллапсынан құтқарады.
«Бұл жоба күзде көлік коллапсын тудырмауы керек. Қозғалысқа кедергі келтірмейтін және жол-көше желісін тарылтпайтын жұмыстарды біртіндеп бастау керек, олар қазір жүргізілуі тиіс, ал негізгі жұмыстар келесі маусымда болуы керек. Бұл дұрыс қабылданған шешім», - деді сарапшы.
Сонымен қатар, ол қазіргі заманғы технология кез келген ауа райында жол жұмыстарын жүргізуге мүмкіндік беретініне қарамастан, басты аспект – жаңа оқу жылының басталуымен көлік санының артуы екенін атап өтті.
«Магистральды көшеде қолдан проблема туғызу – бұл дұрыс емес. Адамдарға дұрыс көзқараспен қарап, сауатты жұмыс істеу қажет», - дейді Руслан Мухомедьяров.
Сол уақытта сарапшы Алина Бисембаева жобаны жүзеге асыруға өте мұқият қараудың маңыздылығын атап өтті.
«Қыс мезгілінде жұмыс істеу әлдеқайда қиын, сондықтан жұмысты аздап күзде бастауға болады, бірақ көше желісіне, әсіресе жол жамылғысына тиіспеген жөн», - дейді ол.
Жалпы, сарапшылар Райымбек даңғылы бойындағы BRT дәлізінің бірінші учаскесінің ұсынылған жобасын жоғары бағалап, оның мегаполис тұрғындарының мобилділігін арттыру және қалалық қоғамдық көлік жүйесін дамыту үшін маңыздылығын атап өтті.
Сарапшылар қауымдастығының пікірін ескере отырып және қала тұрғындары үшін қолайсыздықты барынша азайту мақсатында BRT жобасын бірнеше кезеңде жүзеге асыру туралы шешім қабылданды. Мысалы, құрылыс-монтаждау жұмыстарын келесі жылдың сәуір айында бастау керек.
«Біз Райымбек батыр даңғылы – 70 мыңнан астам көлік жүретін үлкен магистральдің бірі екенін жақсы түсінеміз, сондықтан биыл көлік қозғалысына кедергі келтірмейтін дайындық жұмыстарын бастаймыз. Келесі жылы жұмыстарды Ахрименко көшесі жағынан және Пушкин көшесі жағынан параллельді әдіспен бастаймыз», - деді Алматы қалалық мобилділік басқармасының басшысы Сағындық Телібаев.