Алматы қаласының Әуезов ауданындағы «Сарыарқа» базарында «Сапалы өнім» және жаңа заң жобаларының нормалары бойынша түсіндірме жұмыстарын жүргізу бойынша жылжымалы мобилді заң қызметінің жұмысы ұйымдастырылды, деп хабарлайды Almaty-akshamy.kz.
Мақсаты – тұрғындарға тұтынушылық құқықтарын қорғау мәселелері бойынша заңгерлік кеңестер беру.
Жылжымалы мобилді заң қызметінің мүшелері түсіндірме барысында «Сапалы өнім» жобасының басты міндеті ішкі нарықта азық-түлік өнімдерінің қауіпсіздігін қамтамасыз етуге бағытталғанын және жаңа заң жобасы қоғамның өмір сүру сапасын арттыруға, тұтынушылардың құқықтарын қорғау мәселелерінде үкіметтік емес институттардың рөлін күшейтуге бағытталғанын халық назарына жеткізді.
Өз кезегінде базар тұтынушылары да өз сұрақтарын қойып, пікірлерімен бөлісті.
«Бұл жоба Алматы қаласы Қоғамдық даму басқармасының мемлекеттік әлеуметтік тапсырысы негізінде және Алматы қаласы бойынша Сауда және тұтынушылардың құқығын қорғау департаментінің бағыт беруімен жүзеге асырылуда. Мобилді заң қызметі ай сайын қаланың әр ауданындағы базарлар мен сауда орталықтарында болып, халыққа тұтынушылық құқықтарын қорғау мәселелері бойынша заңгерлік кеңестер береді», - дейді жоба жетекшісі, Халықаралық «Жанашыр» қоғамдық қорының президенті Жаңыл Әпетова.