Алматының Алатау ауданында қымбат автокөліктердің бүйір айналарын ұрлады деген күдікпен 36 жастағы ер адам ұсталды, деп хабарлайды Aqshamnews.kz тілшісі.
Алатау аудандық полиция басқармасының кезекші бөліміне жергілікті тұрғыннан арыз түскен. Оның айтуынша, белгісіз адам Зерделі шағынауданындағы үйлердің бірінің ауласында тұрған Toyota Land Cruiser көлігінің бүйір айналарын жасырын түрде ұрлап кеткен. Келтірілген шығын шамамен бір миллион теңгені құраған.
Жедел-іздестіру шаралары барысында криминалдық полиция қызметкерлері 36 жастағы күдіктіні анықтап, қолға түсірді. Ол өз кінәсін мойындап, түсініктеме берген.
Полиция қызметкерлері ұрланған бүйір айналарды тәркілеп, оларды іс бойынша айғақ зат ретінде тіркеді.
Алатау аудандық полиция басқармасы бөлімінің бастығы Дәурен Керімбаевтың айтуынша, тергеу барысында күдіктінің қала аумағында жасалған басқа да осындай ұрлықтарға қатысы болуы мүмкін екені анықталып жатыр.