Сағат 16:00-дегі жағдай бойынша дауыс беруге келген тұрғындар легі едәуір артты, – деп хабарлайды aqshamnews.kz тілшісі.
Алматылықтардың жоғары белсенділігі мен ұйымшылдығы қаланың барлық ауданында байқалуда.
Әсіресе №138 сайлау учаскесінде, Әуезов ауданындағы №105 мектеп-гимназияда орналасқан №265 учаскеде, сондай-ақ Бостандық ауданындағы №255 және №215 мектепте орналасқан №686 сайлау учаскелерінде тұрғындар белсенді дауыс беріп жатыр.
Түрксіб ауданындағы №76 жалпы білім беретін мектепте орналасқан №449 және Жетісу ауданындағы №326 сайлау учаскелерінде де сайлаушылар легі көп. Сонымен қатар №696, №445, №547, №35 және басқа да көптеген учаскеде қала тұрғындарының белсенді қатысуы байқалады.
Барлық сайлау учаскесінде дауыс беру ұйымдасқан әрі жайлы жағдайда өтіп жатыр. Тұрғындар сайлауға отбасымен келіп, ел болашағына бейжай қарамайтынын білдіруде.
Комиссия мүшелері мен байқаушылар сайлаушылар легінің тұрақты әрі толассыз жалғасып жатқанын атап өтті. Тұрғындар кезек ретімен, белгіленген тәртіпке сай қалыпты жағдайда дауыс беріп жатыр.
Орталық сайлау комиссиясының ресми мәліметіне сәйкес, сағат 16:00-дегі жағдай бойынша Алматыдағы сайлаушылардың жалпы қатысу көрсеткіші 36,65%-ға жетті.