Құрманғазы атындағы Қазақ ұлттық халық аспаптар оркестрі Отан қорғаушылар күні мен Жеңіс күніне орай ауқымды концерт ұйымдастырды, – деп хабарлайды aqshamnews.kz тілшісі.
Кеш бағдарламасында патриоттық шығармалар, соғыс жылдарындағы әндер, ерлік пен батырлықты, Отанға деген сүйіспеншілікті жырлайтын туындылар, сондай-ақ қазақ музыка классикасының үздік әуендері орындалды.
Кеш «Шаттық Отаны» атты әйгілі күймен ашылды. Бұл шығарманы 1952 жылы композитор Сыдық Мұхамеджанов арнайы осы оркестр үшін жазған болатын. Музыканттар аталған күйді Бухарестте өткен IV Дүниежүзілік жастар мен студенттер фестивалінде орындап, оркестр алтын медаль жеңіп алып, лауреат атанған еді.
“Біз бұл шығарманы көптен бері орындамаған едік. Оның дәл Отан қорғаушылар күніне арналған концертте шырқалуының өзіндік мәні бар. Бұл - ерекше мереке. Ол патриотизмді дәріптейді және елдегі бейбітшілік пен келісімді сақтаудың маңыздылығын насихаттайды”, - деді оркестрдің бас дирижері, «Құрмет» орденінің иегері Абылай Тілепберген.
Сондай-ақ бұл кеште дирижерлік тізгінді Жексен Айсын мен Нарын Қажығали сынды өнер майталмандары да кезектесе ұстады.
Мерекелік кеште оркестрмен бірге солистер де өнер көрсетті. Ұзақ үзілістен кейін концертке Құрманғазы атындағы Қазақ ұлттық консерваториясының 4-курс студенті Жайна Бауыржанқызы да қатысты.
“Біз студенттермен бірге көптен бері өнер көрсетпеген едік. Сондықтан бұл ерекше оқиға деуге болады. Жастарымыздың осындай дарынды екені қуантады”, - деді Абылай Тілепберген.
Сонымен қатар оркестрмен бірге IL-Canto квартеті мен Ақылбек Бектасов өнер көрсетті. Әрбір орындалған шығарма көрермендердің ыстық ықыласына бөленді. Өнерсүйер қауым артистерге ұзақ қол соқты.
Бұл концерттің мақсаты - Отан қорғаушыларға құрмет көрсету, ардагерлердің ерлігін ұлықтау ғана емес, сонымен қатар жастардың бойында патриоттық рухты ояту.