Ұлы Отан соғысының қатысушысы, КСРО ІІМ еңбек сіңірген қызметкері, 3-дәрежелі комиссар Құсманғалиев Джанысбек Құсманғалиұлының отбасымен бірге тұрған үйдің қасбетіне ескерткіш тақта ашылды, деп хабарлайды aqshamnews.kz Polisia.kz-ке сілтеме жасап.
Салтанатты жиынға Алматы қалалық ПД басшылығы, жеке құрамы және ІІО-ның ардагерлері қатысты. Аты аңызға айналған тұлға туралы бүгінде ІІМ генералы болып қызмет атқарып жүрген Джанысбек Құсманғалиұлының әріптестері өз естеліктерімен бөлісті.
— Соғыс басталған кезде қалада бандитизм дами бастады, қылмыс көбейді. Осындай іске қарсы тұра алатын адам ретінде Джанысбек Құсманғалиұлы осы қылмыстың өршуіне тосқауыл қою үшін майдан шебінен шақыртылып, осында Алматыға келді. Ол, әрине, бұл міндетті мінсіз атқарды, — деді, ҚР ІІМ құрметті ардагері, әділет генерал-майоры Сұлтан Күсетов.
Алматы қалалық ПД Ардагерлер Кеңесі төрағасының орынбасары, отставкадағы полиция полковнигі Бауыржан Рахымов өз кезегінде Джанысбек Құсманғалиевтің кадр мәселесіне баса назар аударып, жас қызметкерлерді ІІО-дағы арнайы оқу орындарына қылмыстық іздестіру, тергеу, жол полициясының бағыттары бойынша жіберу мәселесіне бірінші кезекте басымдық бергенін атап өтті.