Достық үйінде Қазақстан халқы Ассамблеясының 30 жылдығына арналған «Қазақстан – бейбітшілік пен бірліктің кепілі» атты этномәдени бірлестіктердің республикалық конференциясы өтті. Қатысушылар Ассамблеяның отыз жылдағы жетістіктерін, этносаралық келісім мен ұлттық бірлікті нығайту тәжірибесін, сондай-ақ 2026 жылға арналған жоспарларды талқылады.
Іс-шараға этномәдени бірлестіктердің, үкіметтік емес ұйымдардың және мегаполистегі ҚХА құрылымдарының өкілдерімен қатар Алматы қаласы әкімінің орынбасары Абзал Нүкенов, ҚХА Төрағасының орынбасары Марат Әзильханов және қала Ішкі саясат басқармасының басшысы Айдар Есенбеков қатысты.
Алматы қаласы әкімінің орынбасары Абзал Нүкенов өз сөзінде ҚХА-ның оң рөлін және қазақстандық келісім моделінің бірегейлігін атап өтті.
– Тәуелсіздік туралы айтқанда, ең алдымен бірлікті айтамыз. Бірлік болмаса, тәуелсіздік те болмайды. Қазақстандық бірліктің негізгі тірек тетіктерінің бірі – Ассамблея. ҚХА – мемлекет пен қоғаммен үйлесімді жұмыс істейтін бірегей институт. Біз барлық этномәдени бірлестіктердің үлесін жоғары бағалаймыз және жобаларын жүзеге асыруда табыс тілейміз, – деді Абзал Нүкенов.
Қазақстан халқы Ассамблеясы Төрағасының орынбасары, ҚР Президенті Әкімшілігі ҚХА Хатшылығының меңгерушісі Марат Әзильханов ұйымның 30 жылдығы ел үшін тарихи оқиға болғанын атап өтті. Сондай-ақ ол Ассамблеяның миссиясы – қоғамның бірлігін қамтамасыз ету және барлық құрылымдар мен бірлестіктер үшін үлгі болу екенін еске салды.
– Ассамблея – саяси партиялар, кәсіподақтар мен қоғамдық ұйымдардың жұмысы құрылатын негіз. Біздің мақсатымыз – мемлекет институттарының барлығымен бірлесе отырып, бірлікті сақтау, – деп қосты спикер.
Конференция тәжірибе алмасу, өзекті мәселелерді талқылау және Қазақстан халқы Ассамблеясының халықтық дипломатия институты ретіндегі рөлін нығайту үшін маңызды алаңға айналды. Қатысушылар бірлік, достық және мәдени әралуандық құндылықтарын ілгерілету жұмысы келесі жылы да жаңа жобалар мен бастамалар арқылы жалғасатынын атап өтті.