Алматыда бір топ қарақшы пәтерге басып кіріп, үй иелерін соққыға жыққан. Олар үй иелерін аңшы мылтығымен қорқытып, ақшаның қайда жасырылғанын айтуды талап еткен, деп хабарлайды Aqshamnews.kz тілшісі.
Қылмыс сәтін шабуылдаушылар өздері видеоға түсірген. Беттерін жасырып, үйдегілерді ұрып-соққан. Үй иелерінің бірі бөлмеге бекінгенімен, күдіктілер есікті бұзып кіріп, қарумен қоқан-лоқы көрсеткен.
Кейін полицейлер қаладағы компьютерлік клубтардың бірінде алты күдіктіні ұстады. Тінту барысында аңшы мылтығы мен оқ-дәрілер тәркіленді. Аталған факті бойынша қылмыстық іс қозғалып, тергеу басталды. Алматы қалалық ПД ресми өкілі Салтанат Әзірбектің айтуынша, барлық қатысушылар анықталып, күдіктілер қамауға алынған.