Алматы қаласы әкімдігі Мәдениет басқармасының ұйымдастыруымен қала күнінің қарсаңында, 19 қыркүйек күні Абай алаңында «Ән қанатындағы Алматы» атты дәстүрлі ән кеші жоғары деңгейде өтті.
Алматы қаласы ХХ ғасырдың 30-жылдарынан бастап ұлт мәдениетінің ұйытқысы, ордасы қызметін атқарып келеді. Дәстүрлі өнердің ірі өкілдері, зерттеушілері осы қалада тұрып, еңбек етті. Қазір де профессионалдық типтегі дәстүрлі музыканың ең ірі ошағы – Алматы.
Мұнда этномузыканың белгілі қайраткерлері, дәстүрлі домбырашы, қобызшы, сыбызғышы, әнші-термешілер әзірлейтін арнаулы орта және жоғары оқу орындары, өнер ұжымдары шоғырланған. Қазақ көне музыка аспаптарының жер бетіндегі жалғыз музейі мен еліміздегі жалғыз дәстүрлі өнер театры да осында.
Дәстүрлі ән кешіне Рамазан Стамғазиев, Сәуле Жанпейісова, Еркін Шүкіманов, Ардақ Исатаева, Тілеулес Құрманғалиев, Нұржан Жанпейісов, Амангелді Күзеубай, Шолпан Даржанова, Армат Исламғалиев, Жеңіс Ержанов, Эльза Қарабалина, Талғат Әбуғазы, «Сазген сазы» этнографиялық-фольклорлық ансамблі қатысты.