Қазақстан Жазушылар кітапханасында көрнекті ғалым, абайтанушы, қоғам қайраткері Қайым Мұхамедхановтың туғанына 110 жыл толуына орай "Ұлт руханиятының шамшырағы – Қайым Мұхамедханов" атты дөңгелек үстел өтті.
Жиынға "Қайым Мұхамедханов атындағы Білім және мәдениет орталығы" директоры, ғалымның қызы Дина Мұхамедхан, әдебиеттанушылар мен ғалымдар, университет профессорлары мен студенттер қатысты. Іс-шара барысында тарих ғылымдарының кандидаты Найля Тажикбаева дара тұлғаның өмірі мен еңбектеріне тоқталып, оны дәріптеудің маңызы орасан зор екенін атап өтті. Сонымен қатар Қазақстан Жазушылар кітапханасына Қайым Мұхамедханов туралы кітабын тарту етті. Ал Халықаралық ТҮРКСОЙ сарапшысы, әдебиеттанушы-ғалым Серікқазы Қорабай халқының рухани мәдениетіне қосқан үлесіне тоқталды.
"Биыл 5-ші қаңтарда Алаш рухын арқалап, Абай аманатын қорғап, ұлт мүддесі жолында, біздің болашағымыз жолында жанқиярлықпен күрескен ірі тұлғаларының бірі де бірегейі, Қазақстан Республикасы Мемлекеттік сыйлығының лауреаты, Абайтану ғылымының негізін қалаушылардың бірі, Шәкәрімтану негізін қалаған профессор Қайым Мұхамедхановтың туғанына 110 жыл толды. Ол – қазақ әдебиетіне, ұлтымыздың көркемдік-эстетикалық әлеміне теңдессіз үлес қосып, өз халқының рухани мәдениеті мен ойына жаңа кеңістік ашқан ғалым. Басқасын айтпағанда, ұлы Абай мұрасы мен Абайдың ақындық мектебін зерттеп, насихаттауы Қайым Мұхамедхановтың ғылыми үлкен ерлігі деп білу керек. Ғалым өзінің мұраттарына адал болды. 1951 жылы "Абайдың әдеби мектебін" зерттеп жазған еңбегі үшін 25 жыл жазықсыз сотталып, зардап шексе де, мұқалмады", – деді профессор.
Жазушы-журналист, Қайым Мұхамедханов туралы "Ер қазақ" кітабының авторы Дәулет Сейсенұлы өмірін еліне қызмет етуге арнаған тұлғаның бойындағы асыл қасиеттер мен қайсар мінез қалай қалыптасқанын түсіндірді.
"Қайымның әкесі Мұхамедханның үйі – Абай, Шәкәрім, кейін Мұхтар Әуезов, Алаш арыстары – Әлихан, Ахмет, Міржақып қона жатып, әңгіме-дүкен құратын қасиетті құтханасына айналған. Шәкәрім қажылықтан оралған соң, осы үйде аялдапты. Сонда Мұхамедхан бой түзеп өсе бастаған Қайымға "Алаш арыстарының тізесінде отырып өскен сенің жаман болуға хақың жоқ" дейтін көрінеді. Айтқандай-ақ, Қайым жасынан аталы сөзге, жақсы ортаға үйір болып өсті. Солайша арадағы 25 жас айырмашылығына қарамастан, жас Мұхтар Әуезовтің іні-досына айналды", – деді Дәулет Сейсенұлы.
