Қала тұрғындары мен қонақтары пайдаланылған бөтелкелер мен банкаларды осында қалдыра алады, деп хабарлайды aqshamnews.kz тілшісі.
Алматыдағы Жібек жолы даңғылында пластик бөтелкелер мен алюминий банкаларды жинауға арналған алма пішініндегі торлы құрылым орнатылды. Жоба Eurasian Bank, Mastercard және ECO Network экологиялық қауымдастығының қатысуымен, «Eco Almaty» ЖШС-нің ақпараттық қолдауымен жүзеге асырылды.
Жаңа нысан қаланың қалдықтарды бөлек жинау инфрақұрылымының бір бөлігіне айналады. Қала тұрғындары мен қонақтары пайдаланылған бөтелкелер мен банкаларды осында қалдыра алады. Жиналған қалдықтар кейін қайта өңдеуге жіберіледі. Мұндай шешімдердің арқасында жұмысқа, оқуға немесе серуендеуге бара жатқанда-ақ, арнайы қабылдау пунктін іздемей-ақ, қайта өңдеуге жарамды қалдықтарды тапсыруға болады.
Нысанның ашылуына Алмалы ауданының әкімі Арман Шамшин, Алматы қаласы Экология басқармасының басшысы Серік Әділбаев, ECO Network негізін қалаушы Евгений Мухамеджанов, білім беру саласының өкілдері және Еуразиялық банктің өкілдері қатысты.
Бұл құрылымның орнатылуы қаладағы осындай экологиялық нүктелер желісін кеңейтеді. Бұған дейін алма пішініндегі торлы контейнерлер Dostyk Plaza сауда орталығының маңында және Сайран аумағында пайда болған. Олар қалдықтарды бөлек жинауға назар аудартып, бұл әдетті күнделікті өмірдің бір бөлігіне айналдыруға ықпал етеді.
Бұл бастама Алматыдағы басқа да экологиялық жобаларды толықтырады. Қалада Эко-хабтар мен «Эко-Трак» мобильді пункті жұмыс істейді, сондай-ақ Recycle Бірге акциялары өткізіледі. 2026 жылдың басынан бері қалалық экологиялық акциялар аясында 1,8 тоннаға жуық қайта өңдеуге жарамды қалдық жиналды. Ал 50 мың пластик қақпақтан «Таза Қазақстан» стеласы жасалды.