Алматы қаласында полиция департаменті қызметкерлері арасында ұлттық күрестен дәстүрлі "Полиция Барысы" турнирі өтті, – деп хабарлайды aqshamnews.kz тілшісі.
Жарыс департаменттің спорт залында ұйымдастырылып, оған спорттық разряды бар 112 полиция қызметкері қатысты. Турнирдің ашылу салтанатына Алматы қаласы полиция департаментінің бастығы Айдын Кабдулдинов қатысып, спортшыларға сәттілік тілеп, адал әрі тартысты белдесуге тілектестік білдірді. Тартысқа толы белдесулердің қорытындысы бойынша "Полиция Барысы" атағын департаменттің автошаруашылық қызметкері Жансерік Жұмабай жеңіп алып, жоғары дайындық деңгейі мен шеберлігін көрсетті.
Бірінші орынды — Түрксіб аудандық полиция басқармасы, екінші орынды — патрульдік полиция полкі, үшінші орынды — жедел қимылдайтын арнайы жасақ қызметкерлері Алматы қаласы полиция департаментінің арнайы және кәсіби даярлық басқармасының бастығы Ерлан Әбсадық мұндай жарыстардың қызметкерлердің кәсіби және физикалық дайындығын арттырудағы маңызын атап өтті.
– Осындай турнирлер полиция қызметкерлерінің дене дайындығын нығайтып қана қоймай, командалық рухты қалыптастырады, төзімділік пен жігерді шыңдайды. Полиция қызметкері үшін күш-қуат, тәртіп пен шыдамдылықтың маңызы ерекше. Өйткені бұл қасиеттер қызметтің тиімділігі мен азаматтардың қауіпсіздігіне тікелей әсер етеді, – деді Ерлан Әбсадық.
Айта кету керек, "Полиция Барысы" турнирі Алматы қаласы полиция департаментінде жыл сайын өткізіліп келеді. Оның басты мақсаты – спорттық дәстүрлерді дамыту, ұжымдық рухты нығайту және қызметкерлердің физикалық даярлық деңгейін арттыру.
