Алматыда «Петросун» ЖШС сұйытылған мұнай газын сату кезінде монополиялық жоғары бағаларды пайдаланғаны анықталды.
Бұл туралы өңірлік коммуникациялар қызметі алаңында ҚР Бәсекелестікті қорғау және дамыту агенттігінің Алматы қаласы бойынша департаментінің басшысы Нұржан Ұранхаев айтты, -деп хабарлайды Аlmaty-akshamy.kz ҚазАқпарат-қа сілтеме жасап.
«2021 жылы қыркүйек-қараша айларында сұйытылған мұнай газының көтерме бағасы уәкілетті орган бекіткен шекті бағадан 300%-дан астам өсіп, тоннасына 183 мың теңгені құраған. Бұл өсім биржалық сауда-саттық кезінде «Петросун» ЖШС тарапынан тауар бағасының объективті дәлелді себептерсіз үздіксіз көтеру себебінен болды», - деді спикер.
Қабылданған шаралардың қорытындысы бойынша мемлекетке 2,2 млрд теңгеден астам шығын өтелді. Сонымен бірге, монополияға қарсы органның қорытындысы бойынша нарықтың жекелеген субъектілеріне мұнай өнімдерін (АИ-92, ДТ) өткізуден негізсіз бас тартуда көрсетілген өзінің үстем жағдайын теріс пайдалану фактісі бойынша «Петросун» ЖШС 600 млн теңгеден астам сомаға әкімшілік жауапқа тартылды.
«Сотта қарау нәтижелері бойынша монополияға қарсы органның іс-әрекеттері заңды әрі негізді деп танылып, бүгінгі таңда айыппұл сомасы толығымен бюджетке қайтарылды», - деді Нұржан Ұранхаев.