Медеудегі отпен күрес кезінде құтқарушылардың бірі көз жұмды.
Алматы қаласында Медеуде тұтанған отпен күрес кезінде өрт сөндіруші Арслан Құрманбеков мерт болды, деп хабарлайды Аlmaty-akshamy.kz ТЖМ баспасөз қызметіне сілтеме жасап.
«Кеше, 8 мамыр күні қызметтік борышын атқару кезінде, Алматы қаласында Іле-Алатау мемлекеттік ұлттық табиғи паркі аумағындағы тау бөктерінде өрт сөндіруге жұмылдырылған топ құрамында болған Алматы қаласы Төтенше жағдайлар департаменті Өрт сөндіру және апаттық-құтқару қызметінің қызметкері, 7-өрт сөндіру бөлімінің аға өрт сөндіру-құтқарушысы, азаматтық қорғау сержанты Құрманбеков Арслан Жолдасбекұлы жанып жатқан ағаш діңгегінің құлауы салдарынан көз жұмды».
Өрт сөндіруші Арслан Құрманбеков Алматы облысында 1994 жылы 23 тамызда туған. Азаматтық қорғау органдарында 2015 жылдың 14 желтоқсанынан еңбек етіп келді.
«Төтенше жағдайлар министрлігі Арслан Жолдасбекұлының туғандары мен жақындарына қайғыра көңіл айтады. Оны кәсіби маман ретінде әрдайым еске алатын боламыз.
Арслан жауапты қызметкер, жоғары кәсіби және сауатты маман болды. Ұжымы оны ынта-жігері, адалдығы және мамандығына деген махаббаты үшін бағалады.
ТЖМ қаза болған өрт сөндірушінің отбасына жан-жақты көмек мен қолдау көрсететін болады», - делінген министрлік мәліметінде.