Мақсат – қазақ халқының өнері мен мәдениетін жан-жақты насихаттау.
Алматыда мемлекеттік тілде еркін сөйлейтін әртүрлі ұлт орындаушыларының қатысуымен фестиваль өтті, деп хабарлады Almaty-akshamy.kz.
Аталмыш шараға қазақ ұлттық аспаптарын жетік меңгеріп, мемлекеттік тілде еркін сөйлейтін әртүрлі ұлт орындаушылары қатысты.
«Атап айтқанда, Жамбыл атындағы Қазақ мемлекеттік филармониясының сахнасында Олег Никитин домбырада Құрманғазының «Адай» күйін, Бабек Иылдырым қобызда «Қаракемер» күйін орындап, халықты тәнті етті. Денис Яковлев халық әні «Екі жиренді», опера әншісі Ангелина Югай «Қуанамын» әнін, Роксана Құрбанова халық әні «Арман-айды» көрермендердің ерекше қошеметіне бөлене отырып орындады, сондай-ақ басқа да әртістер тамаша өнер көрсетті. Концерттік бағдарлама Игорь Благодарныйдың орындауындағы «Атамекен» әнімен аяқталды», - делінген Мәдениет және спорт министрлігінің баспасөз қызметінің хабарламасында.
Іс-шараның негізгі мақсаты – Қазақстанда тұратын этникалық топтар арасында қазақ халқының өнері мен мәдениетін жан-жақты насихаттау, орындаушылардың кәсіби шеберлігін арттыру.