Алматыда ақын, драматург, Қазақстан Мемлекеттік сыйлығының лауреаты, Еңбек сіңірген қайраткер Нұрлан Оразалин N301 сайлау учаскесінде дауыс берді.
Ақын бүгінгі сайлауда Қазақстан халқы жұдырықтай жұмылып, өз конституциялық құқығын пайдалануы керек екенін айтты, деп хабарлайды Almaty-akshamy.kz ҚазАқпаратқа сілтеме жасап.
«Кез келген сайлаудың тарихи сипаты болады. Бүгінгі сайлаудың басқа сайлаулардан жөні бөлек. Себебі, шынымен егер демократиялық құндылықты бағалайтын болсақ қазір мол мүмкіндік беріліп жатыр. Бұл шын мағынасындағы сайлаудың жаңа үлгісі деп бағалауымыз керек. Қазір дүние жүзі біздің елге қарап отыр. Сондықтан Қазақстан халқы жұдырықтай жұмылып, өз конституциялық құқығын дұрыс пайдалануы керек деп есептеймін», - деді Нұрлан Оразалин.
Ол өз көңілінен шыққан партия мен ел ертеңі үшін еңбек етіп жүрген азаматтарға дауыс бергенін жеткізді.
«Мен өз ойымда жүрген, көңілімде жүрген ойларымды айтқан партияға дауыс бердім. Оны өзім білемін. Ал енді жалғыз мандатты кандидаттардың ішінде белгісіз азаматтар көп екен. Маған таңдау қиын болды. Дегенмен, олардың арасында елдің ертеңі үшін еңбек етіп жүрген азаматтар бар, мен соларға дауыс бердім. Біздің сақтанатын бір нәрсеміз бар – ол жең ұшынан жалғасып кетпей, шын жүйріктерді таңдай білсек, Жаңа Қазақстанның алға қойған мақсаты мен мұратын орындаймыз деп ойлаймын. Мен Жаңа Қазақстан үшін, болашақ ұрпағымыз мықты, текті болуы үшін дауыс бердім», - деді ақын Нұрлан Оразалин.