Алматыда мемлекет пайдасына тәркіленуге тиіс мүлікке қатысты тыйымды ақпараттық жүйе арқылы заңсыз алып тастап, жылжымайтын мүлікті бөтен адамдардың атына қайта рәсімдеуді ұйымдастырғандар сотталды, деп хабарлайды Aqshamnews.kz тілшісі.
Қаржылық мониторинг агенттігінің мәліметінше, іс Коспаевтың басшылығымен әрекет еткен ұйымдасқан қылмыстық топқа қатысты тергеу аясында қаралған. Бұған дейін бұл топтың «AV-Construction» ЖШС, «Стекольный завод» ЖШС, «Шалқар 17» ЖШС, «Бахар-А» ЖШС және өзге де кәсіпорындарды рейдерлік жолмен басып алу фактілері бойынша әшкереленгені хабарланған.
Сот шешімімен тәркілеу мақсатында Алматыдағы «Никольский» базары аумағында орналасқан «Nikolsky Investment» ЖШС-ге тиесілі жер телімі мен мүлкіне тыйым салынған. Алайда 2025 жылдың қыркүйегінде Аслан Пухаев, Антон Соловьёв және Жақсылық Сәрсенбаев «Азаматтарға арналған үкімет» мемлекеттік корпорациясының ақпараттық жүйесіне жалған мәлімет енгізу арқылы бұл тыйымды заңсыз алып тастауды ұйымдастырған.
Кейін жалпы құны 2,2 млрд теңгеге бағаланған мүлік пен жер телімі әрі қарай сату үшін жалған тұлғалардың атына қайта рәсімделген.
Сот үкімімен айыптылар 6 жыл 6 ай мерзімге бас бостандығынан айырылды. Үкім заңды күшіне енген. Мүлік мемлекет меншігіне қайтарылды.
ҚМА мемлекеттік ақпараттық жүйелерге заңсыз араласу және соған байланысты құқыққа қайшы әрекеттер үшін жазаның бұлтартпастығын ескертті.