Алматыда жастарды көптеп дәстүрлі спортқа тартуды көздейтін «Youth Nomads» дейтін әлеуметтік жоба басталды. Өңірлік коммуникациялар қызметінде өткен пресс-конференцияда ұйымдастырушылар көпшілікті жобаның мән-жайымен таныстырды, деп хабарлайды aqshamnews.kz
Алматының жастар саясаты басқармасының қолдауымен іске асып жатқан бұл жоба – қазір жұмыссыз отырған, еш жерде оқымайтын NEET санатындағы жастарға бағытталған. Бастаманың мақсаты – ұлттық спорт пен дәстүр арқылы оларды әлеуметтік бейімдеуге атсалысу.
«Бұл жастарды әлеуметке жақындастырып, қоғамға бейімдеп, олардың жаңа кәсіпті игеруіне жол ашатын, жастарды ұлттық спорт арқылы дамытуды көздейтін үлкен жоба. Жастарды салауатты өмір салтын ұстануға шақыратын жол», — деді жастар саясаты басқармасы бастығының орынбасары Алмаз Кеңесбай.
Бұл жобада бірнеше ұлттық спорт түрлерін қамтыған фестиваль өтпек. Алматының үлкен-үлкен базарларында жұмыс істейтін жастар қазақша күрестен, арқан тартудан, асық атудан, тоғызқұмалақтан өзара жарысқа түседі онда. Алғашқы кезеңде іріктеуден өтіп, ақтық айқас 28 мамыр күні өтіп, сол күні жеңгендері сыйлық алады.
«Youth Nomads» жобасының жетекшісі Тауасар Мұратханның айтуынша, фестивальда мәдени бағдарламалар: қолөнершілердің бұйымдары қойылған көрме, концерт пен белсенді жастардың мастер-класы да өтпек. Бұл жастардың шабытын шыңдап, елдің бай мәдениетіне кіріктіре түспек оларды.
«Youth Nomads — фестиваль ғана емес, жастар мен қоғамның арасындағы әлеуметтік көпір де. Спорт, дәстүр, ұжымдық жұмыс арқылы олар қоғамнан өз орнын тауып, өмірге үмітпен, жаңаша қарай бастайды», — дейді ұйымдастырушылар.
Жоба жоқ дегенде қаланың екі үлкен базарын қамтымақ. Жобаның соңында әкімдіктің өкілдері, мәслихат депутаттары, блогерлер мен белсенділер қазылық жасап, көзге түскен жастарды марапаттайды.
Ұйымдастырушылардың айтуынша, жобаға қазірдің өзінде жастар мен әлеметтік құрылымдар қатты қызығып, қатысуға өтініш білдірген.