Алматыда 2025 жылдың қорытындысы бойынша мемлекеттік қызметті дамыту жұмысын қорытындылады: этикаға байланысты бақылау күшейіп, қаншама кеңес беріліп, біраз құрылымдық реформа жүзеге асты. Өңірлік коммуникациялар қызметінде өткен баспасөз мәслихатында қала әкімі аппаратының әдеп жөніндегі уәкілі Мамай Ахетов осылай деп мәлімдеді, – деп хабарлайды aqshamnews.kz тілшісі.
Оның айтуынша, мемлекеттік қызметшілер арасында Әдеп кодексінің нормасын түсіндіріп, құқық бұзушылықтың алдын алуға көп көңіл бөлініпті. Тек төртінші тоқсанда мемлекеттік қызметкерлерге ғана емес, азаматтар мен ұйымдарға да кеңес беріп, көмек көрсеткен. Сонымен қатар ондаған лекция мен семинар да өтті.
«Әдеп кодексі қазір жай бір құжат емес, мемлекет пен қоғам арасындағы сенімді қалыптастыратын практикалық құрал. Азаматтар тарапынан ашықтық пен айқындыққа сұраныс артып келеді, мемлекеттік қызметкерлер де соған сай болуы тиіс енді. Сондықтан біз тек құқық бұзушылыққа қарсы күреспен шектелмей, оның алдын алуға көп мән береміз. Басты мақсатымыз — қызметтегі әдептен аспайтын мәдениет қалыптастыру», — дейді спикер.
Бір жыл ішінде Алматы әкімдігінде құрылымдық өзгерістер болды. Экономика және қаржы басқармалары біріктірілді, тілдер және ономастика бөлімі ішкі саясат саласына беріліп, қалалық мобильдік басқармасы екі бөлек органға бөлінді. Осыған байланысты 96 мемлекеттік қызметшіге әлеуметтік қорғау мәселелері бойынша консультациялық көмек көрсетілді.
2025 жылы мемлекеттік қызметке алғаш рет 91 адам қабылданды. Оларға түсіндіру жұмысы жүргізіліп, ашық дереккөзге қажетті ақпарат шықты.
Мүдделер қақтығысының алдын алуға ерекше көңіл бөлінеді. Қаланың 25 басқармасы мен 8 аудандық әкімдігінде жақын туыстардың қызметтес болуына жол бермеу талабы тұрақты түрде тексеріліп тұрады. Әзірге бақылау нәтижесі мұндай деректі анықтай қойған жоқ.
Сонымен қатар құқықтық және этикалық сауаттылықты арттыру бағытында жүйелі жұмыс жүргізіліп жатыр. Мемлекеттік қызметшілерге сыбайлас жемқорлыққа қарсы қызметтің материалдары таныстырып, қызметтік мінез-құлық, құмар ойындарға қатысуға тыйым салу мен діни көзқарастарды таңуға жол бермеу тақырыптарында лекциялар өте бастады. Бұл бағытта 184 іс-шара, оның ішінде 66 семинар ұйымдастырылды.
«Біз қызметтен тыс мінез-құлыққа қатысты тәуекелдердің алдын алуға да назар аударамыз. Құмар ойыны өтетін орындарға бару, діни салада бейтараптық сақтау — бұл енді жеке мәселе емес, кәсіби жауапкершілік. Сондықтан мұндай тақырыпты үнемі талқылап, түсіндіру қажет. Осы мақсатта оқыту форматтарын және ұжымдармен ашық диалогты белсенді қолданамыз», — дейді Мамай Ахетов.
Мемлекеттік қызмет істері департаментімен бірлесіп, барлық жергілікті атқарушы органдарда қызметкерлерді деструктивті діни ағымдарға тартудың алдын алатын арнаулы жиналыс өткізіліп жатыр. Оларға барлық мемлекеттік қызметшілер қатысады.
Сонымен қатар түсіндіру жұмысында мемлекеттік қызметшілердің құқығы мен кепілдігі, қызметтегі теңдік пен кез келген қысым көрсету түріне, оның ішінде жыныстық қысымға жол бермеу жағын назарда ұстаймыз.
Бұдан бөлек, қоғамдық тәртіп пен адамгершілікке қатысты баптар бойынша мемлекеттік қызметшілердің әкімшілік жауапкершілікке тартылуын бақылау да қолға алынды. Талдау Бас прокуратура жанындағы «Талдау орталығы» жүйесінің деректері негізінде жасалып, қаланың барлық аудандық әкімдігі мен басқармасындағы жағдайды бағалауға мүмкіндік береді.