Алматыда "Инновациялық технологиялар паркі" арнайы экономикалық аймағының аумағында медициналық бұйымдар шығаратын жаңа жоғары технологиялық зауыттың ашылуы өтті, - деп хабарлайды aqshamnews.kz.
Juldyz Kenan Co., Ltd компаниясы - бұл катетер, зондтар, патологиялық материалдарды жинауға арналған контейнерлер және елдегі басқа да медициналық өнімдердің жалғыз өндірушісі. Инвестициялардың жалпы көлемі 2,1 млрд теңге болды. Кәсіпорында 100-ге жуық жұмыс орны құрылды, өндірістік қуаттылық жылына 10 млн бірлікке дейін өнім шығаруға мүмкіндік береді. Зауыт өнімдері медицинаның әртүрлі бағыттарында — реанимация мен хирургиядан бастап неонатология мен педиатрияға дейін сұранысқа ие. Бүкіл желі сертификатталған және ISO 13485 халықаралық сапа стандарттарына сәйкес келеді.
Кәсіпорын өндірістік циклдің барлық кезеңдерін қамтиды: жобалаудан бастап клиникалық сынақтарға, орау және стерильдеуге дейін. Жалпы ауданы 7 000 шаршы метр болатын аумақта заманауи өндірістік желілер, зертхана және қойма үй-жайлары орналасқан. Өндірістік үдерістерге экструзия, қысыммен құю, фрезерлеу, жинау, орау және H14 сыныпты таза өндіріс жағдайында стерильдеу кіреді.
Инвестор және зауыт басшысы Бағлан Баккуловтың айтуынша, Juldyz Kenan компаниясы нарықта 30 жылдан астам уақыттан бері жұмыс істеп келеді және бүгінде 169 түрлі өнім түрін ұсынады. Жаңа кәсіпорынның ашылуымен компания ішкі нарықтағы сұраныстың 90%-ына дейін қамтамасыз ете алатын болады. Бүгінде компания өнімдері 2670-тен астам медициналық ұйымға жеткізіліп отыр. Сонымен қатар, Ресей, Өзбекстан, Қырғызстан, Тәжікстан, Беларусь, Иран және Ауғанстан елдеріне экспорт жүзеге асырылып жатыр.
Компания инновацияларды енгізуге ерекше назар аударады. Атап айтқанда, инесіз жүйелерді тіркеу аяқталды, оларды нарыққа жылына 3-4 млн данаға дейін шығару жоспарлануда. Өндіріс АҚШ компоненттерін қоса алғанда, жоғары сапалы, қауіпсіз шикізатты қолдану арқылы жүзеге асырылады.
Ашылу салтанаты аясында медицина ғылымдарының докторы, Акушерлік, гинекология және перинатология ғылыми орталығы директорлар кеңесінің төрайымы Зауреш Аманжолова зауыт өнімдері бүгінде босану кезінде қолданылып жатқанын атап өтті. Атап айтқанда, кәсіпорын бұған дейін отандық нарықта қолжетімсіз болған жаңа туған сәбилерге арналған қысқыштарды өндіруді жолға қойған.
Зауыттың ашылуы отандық өнеркәсіп пен медициналық инфрақұрылымды дамытудағы, сондай-ақ Қазақстанның медициналық бұйымдар саласындағы экспорттық әлеуетін нығайтудағы маңызды қадам болды. Естеріңізге сала кетейік, бүгінде зауыт орналасқан "Инновациялық технологиялар паркі" АЭА қатысушылары 182 компания болып табылады, тартылған инвестициялар көлемі 205 млрд теңгені құрайды, 6 900-ден астам жұмыс орны құрылды. 2025 жылы мұнда 18,5 млрд теңгеге алты жаңа жобаны іске қосу жоспарлануда (оның ішінде Juldyz Kenan Ltd.).