Алматыда шығармашылық және академиялық қауымдастық өкілдері конституция жобасы мен алдағы референдум жөнінде пікір білдіріп, оның мемлекет пен мәдениет саласына болашақта қалай әсер ететінін айтты, – деп хабарлайды aqshamnews.kz тілшісі.
Режиссер, өнер қайраткері Болат Қалымбетов негізгі заңның стратегиялық рөлін атап өтті.
«Конституция – біздің негізгі заңымыз, үлкен стратегиялық құжат. Тереңірек ойласақ, дәл осы құжатта болашақ мемлекеттің негізі мен оның тәуелсіздігінің кепілдігі қаланған. Академия студенттері, оқытушылар, профессорлар, халық әртістері – барлығымыз азаматтық ұстанымымызды танытып, бір кісідей референдумға келуіміз керек», – дейді ол.
Профессор, Қазақстанның еңбек сіңірген қайраткері Жұмақын Қайрамбаев кез келген қоғам үшін негізгі заңның тарихи маңызы өте зор екенін айтады.
«Ежелгі заманнан бүгінге дейін әр халықтың өз негізгі заңы болған. Кейде ол ауызша, кейде жазбаша түрде болғанымен, бірақ болған ол. XXI ғасырда тәуелсіздікті, тілімізді, ұлтаралық келісімді сақтау үшін берік құқықтық негіз болуы керек. Біз үшін мұндай негіз – конституция».
Өнертанушы, профессор Бақыт Нұрпейіс жаңа конституция жобасындағы зияткерлік меншікті қорғауға қатысты бапқа тоқталды.
«Қазір жаңа конституция жобасын бәрі талқылап жатыр. Менің ойымша, онда зияткерлік меншік мәселелеріне көп көңіл бөлінген, бұл әсіресе өнер саласы үшін өте керек дүние. Әңгіме сценарийге, музыкалық шығарма мен басқа да шығармашылық еңбекке авторлық құқықты қорғау туралы болып отыр. Алдағы өзгерістер мәдениетті сақтау мен дамытуға оң ықпал етеді деген үміт бар», – деп қорытты.
