Ауруханаға жатқызылған науқастар саны өсіп жатыр.
Алматы қаласы қоғамдық денсаулық басқармасының басшысы Нариман Табынбаев Өңірлік коммуникациялар қызметінде өткен брифингте халықты тағы да вакцина алуға шақырды. Ол жүктеменің дәрігерлерге, әсіресе, алғашқы медициналық көмекке едәуір артқанын айтты, деп хабарлады Almaty-akshamy.kz.
Қалалық денсаулық басқармасы басшысының айтуынша, ауруханаға жатқызылған науқастар саны өсуде. Егер бір ай бұрын бұл көрсеткіш тәулігіне 40-70 науқас болса, бүгінде жұқпалы аурулар ауруханасында емделуді қажет еткен коронавируспен ауыратын науқастардың саны 400 адамға жетеді.
«Көптеген науқастар үйде емделуде. Қазірдің өзінде 7 361 науқас бақылауда. Телемедицина орталығының штатын қосымша мамандарды тарта отырып, науқастарға қашықтан кеңес беретін 84 қызметкерге дейін көбейтуге тура келді», – деді Нариман Табынбаев.
ҚДБ басшысы бірінші кезектегі міндет өлім жағдайының көбеюіне жол бермеу екенін айтты.
«Алматыда "жедел жәрдем" шақырудың тәуліктік саны 2 700-ге жетті. Шілде айында ЖРВИ, КВИ және пневмониямен шақырудың үлесі 2 есе артты. Тәуекел тобында әлі де созылмалы аурулармен ауыратын адамдар бар», – деді спикер.
Нариман Табынбаевтың айтуынша, жаңа «дельта» штамы жастар қауымына қауіпті. Алматыда 40 жасқа дейінгі 2 адам коронавирустан қайтыс болды.
«Коронавирустың жаңа штамын жұқтырған науқастардың жағдайы алты сағат ішінде нашарлауда», – деп толықтырды ҚДБ басшысы.
Еске салсақ, КВИ таралуына қарсы тұрудың жалғыз жолы вакцина алу. Н.Табынбаев алматылықтарды өз денсаулығы мен жақындарының денсаулығын сақтау үшін белсенді түрде вакцина алуға шақырды.
Алматыда екпе пункттерінің кең желісі ашылды. Күн сайын 15-20 мыңға дейін екпе алуға мүмкіндік бар. 26 шілдедегі жағдай бойынша, вакцинаның 1-ші компонентінің 768 545 дозасы және 2-ші компонентінің 499 185 дозасы алынды.