Алматыда Nestlé тауар белгілеріне құқықтарды бұза отырып сатылған контрафактілік өнім анықталып тәркіленді, деп хабарлайды aqshamnews.kz Алматы қаласының Әділет департаментіне сілтеме жасап.
Зияткерлік меншік құқықтарын қорғау және тіркелген тауар белгілерін заңсыз пайдалануға жол бермеу мақсатында Алматы қаласы Әділет департаментінің Зияткерлік меншік құқықтары бөлімімен кәсіпкерлік субъектісі «А»-ға қатысты жоспардан тыс тексеру жүргізілді.
Тексеруді жүргізуге негіз болған — халықаралық танымал Nestlé тауар белгілерінің құқық иесі болып табылатын Societe des Produits Nestlé S.A. компаниясының ресми өтініші.
Тексеру нәтижесінде тұтынушыларды өнімнің шығу тегі туралы жаңылыстыратын, түпнұсқа тауар белгілеріне ұқсас дәрежеге дейін визуалды түрде ұқсас жалған белгілерді пайдалану фактілері анықталды.
Іс-шаралар барысында уәкілетті қызметкерлермен 29 000-нан астам жалған белгілермен таңбаланған шоколад батончиктері тәркіленді. Көрсетілген өнім құқық иесінің айрықша құқықтарын бұза отырып сатылған және Қазақстан Республикасының Әкімшілік құқық бұзушылық туралы кодексінің 158-бабында көзделген әкімшілік құқық бұзушылық белгілерін қамтиды.
Іс материалдары процессуалдық шешім қабылдау үшін сотқа жолданатын болады.
Алматы қаласының Әділет департаменті контрафактілік өнім айналымының жолын кесу, құқық иелерінің заңды мүдделерін қорғау және зияткерлік меншік саласында құқықтық тәртіпті нығайту бойынша жүйелі жұмысын жалғастыруда.