Ұрлықшы Ресей Федерациясының азаматы болып шықты
Алматыда көлік айнасын ұрлаған ер адам ұсталды, деп хабарлайды Almaty-akshamy.kz Polisia.kz-ке сілтеме жасап.
Алғашқы арыз полицияға 15 қаңтарда келіп түсті. Белгісіз біреу қала тұрғынының Mercedes көлігінен бүйір айналарын ұрлап кеткен. Бірнеше күннен кейін тағы үш бірдей сигнал келді.
«Жедел-іздестіру шаралары барысында ұрлық жасаған күдікті ұсталды. Ол 30 жастағы Ресей Федерациясының азаматы болып шықты. Негізінен ол Mercedes көліктерінің бүйір айналарын ұрлаған. Шамасы, оларды сатуды жоспарлаған. Қазіргі уақытта оның 3 ұрлық жасағаны дәлелденді. Басқа да қылмыстарға қатысы бар-жоғын анықтау жалғасуда», – деді Бостандық аудандық Полиция басқармасының бастығы Думан Аухадиев.
Ұсталған азаматтың тұрғылықты жерінен полиция қызметкерлері бүйір айналардың бірнеше жиынтығын тәркіледі. Анықталған деректер бойынша сотқа дейінгі тергеу амалдары жүргізілуде.