Алматылық «Целинный» кинотеатры көпфункционалды заманауи өнер ордасына айналуда. Бұл туралы aqshamnews.kz сайты хабарлайды.
1964 жылы салынған ғимарат Қазақстандағы алғашқы тәуелсіз заманауи өнер ордасы болады. Мұнда көрмелер, концерттер, кино көрсетілімдері және түрлі шығармашылық іс-шаралар өтеді.
Жоба әйгілі британдық сәулетші Асиф Ханның жетекшілігімен жүзеге асуда. Ол ғимараттың негізгі архитектуралық ерекшеліктерін сақтай отырып, оны заманауи стандарттарға сай бейімдеді. Жаңарту жұмыстары 2018 жылы басталғанымен, пандемия салдарынан созылып кетті.
Ғимараттың толқынды пішіндегі қасбеті арнайы фибробетонмен қапталып, петроглифтерге ұқсас бедерлі элементтермен әрленеді. Асиф Ханның айтуынша, бұл шешім суретші Евгений Сидоркиннің кеңестік кезеңдегі кескіндемелік шығармасына негізделген, ол қазақтың дәстүрлі тұрмысын бейнелеген.
"Менің мақсатым – тек кеңестік кинотеатрды қалпына келтіру ғана емес, ешқашан болмаған «Целинныйды» ашу. Бұл болашақ ұрпақтың өнері мен шығармашылығы үшін жасалған кеңістік. Заманауи идеялар мен футуристік дизайн үйлескен бұл мекеме Орталық Азия суретшілері үшін ерекше мүмкіндік болады", – дейді Асиф Хан.
Орталықта:
Қазақстандық және орталықазиялық суретшілердің жұмыстарын қолдау;
Галерея, кітапхана, шеберхана және кітап дүкенін орналастыру;
Биік төбелі, кең залдары мен панорамалық терезелері бар шығармашылық кеңістік жасау жоспарланған.
«Целинный» мәдени орталығы биыл көктемде ашылады.