Алматыда көктемгі көріктендіру науқаны жалғасуда. Қалалық сенбіліктер мен экологиялық акцияларға Алматы ауыр машина жасау зауыты (АЗТМ) мен «Асфальтобетон 1» кәсіпорнының қызметкерлері де белсенді түрде қосылды, – деп хабарлайды aqshamnews.kz тілшісі.
АЗТМ ұжымы кәсіпорын аумағында және оған іргелес скверде санитарлық тазалау мен көгалдандыру жұмыстарын жүргізді. Қатысушылар қоқыс жинап, өткен жылдан қалған жапырақтарды шығарды, жүргінші жолдары мен жасыл аймақтарды ретке келтірді.
Сонымен қатар, «Таза Қазақстан» бастамасы аясында қалалық экология және қоршаған орта басқармасымен бірлесіп, кәсіпорын аумағында ағаш көшеттері отырғызылды. Акцияға зауыт қызметкерлері, экологиялық қызмет өкілдері және еріктілер қатысты.
Жұмысшылар қажетті құрал-жабдықтармен — қолғаптармен, сыпырғыштармен, тырмалармен және күректермен қамтамасыз етілді. Тазалық және көркейту жұмыстарына кәсіпорынның түрлі бөлімдерінің қызметкерлері жұмылдырылды.
«Таза Қазақстан – таза қала»акциясын біз толық қолдаймыз», — деді АЗТМ бас директорының орынбасары Асхат Тілеубердиев.
«Асфальтобетон 1» кәсіпорнының қызметкерлері де өндірістік алаң мен оған іргелес аумақтарда санитарлық тазалау және көріктендіру жұмыстарын жүргізді. Сенбілік барысында қоқыс жиналып, арықтар тазартылып, қоғамдық аймақтар ретке келтірілді.
Кәсіпорындардың мұндай бастамаларға қатысуы қаланың санитарлық жағдайын жақсартуға, аумақтарды көгалдандыруға және экологиялық мәдениетті қалыптастыруға оң әсер етеді.