Алматы қаласында Ұлттық қауіпсіздік комитеті Департаменті жанындағы терроризмге қарсы орталықтың бастамасымен кәсіпкерлік басқармасы және бизнес-құрылым өкілдерінің қатысуымен оқыту семинары өткізілді. Іс-шара коммерциялық және әлеуметтік маңызы бар нысандарда антитеррористік қауіпсіздікті қамтамасыз ету мәселелеріне арналды.
Мамандардың айтуынша, бизнес нысандары халық көп шоғырланатын, ашық режимде жұмыс істейтін орындар болғандықтан, жоғары тәуекел тобына жатады. Сауда және қойма үй-жайларының болуы қауіпсіздік талаптарын қатаң сақтауды қажет етеді. Осыған байланысты қатысушыларға терроризмге қарсы іс-қимыл саласындағы заңнама талаптары және нысандардағы қауіпсіздікті ұйымдастырудағы басшылықтың жауапкершілігі түсіндірілді.
Семинар барысында кәсіпкерлік нысандардың антитеррористік қорғалуына қатысты нормалар кеңінен талқыланды. Атап айтқанда, өткізу режимін ұйымдастыру, инженерлік-техникалық жабдықтау, бейнебақылау жүйелерінің жұмысы, кіруді бақылау және күзет құрылымдарымен өзара іс-қимыл мәселелері қарастырылды. Бұл талаптарды орындау тек формальды міндет емес, қызметкерлердің, келушілердің және мүліктің қауіпсіздігін қамтамасыз етудің маңызды шарты екені атап өтілді.
Кездесу барысында қауіпсіздікті қамтамасыз етудің практикалық қырлары да қозғалды. Қатысушылар ішкі бақылауды ұйымдастыру, персоналды төтенше жағдайлар кезіндегі іс-әрекеттерге үйрету, эвакуация және әрекет ету жоспарларын жетілдіру мәселелерін талқылады. Сонымен қатар кәсіпкерлер өзара тәжірибе алмасып, бірлескен оқу-жаттығулар өткізу және қауіпсіздік стандарттарын жетілдіру бойынша ұсыныстарын білдірді.
Іс-шара қорытындысы бойынша қатысушылар мұндай кездесулерді тұрақты түрде өткізу қажеттігін атап өтті. Олардың пікірінше, мұндай жиындарды тоқсан сайын ұйымдастыру қауіпсіздік деңгейін дер кезінде бағалауға және жаңа қауіп-қатерлерге жедел әрекет етуге мүмкіндік береді.
Ұйымдастырушылар кәсіпкерлік нысандарының антитеррористік тұрақтылығын арттыру – үздіксіз жүргізілетін процесс екенін атап өтіп, бұл бағытта барлық қызметтердің үйлесімді жұмысы, тәуекелдерді дұрыс басқару және бизнес өкілдерінің белсенді ұстанымы маңызды екенін жеткізді.