Алматыда кәсіпкерлермен жаңа экологиялық талаптар талқыланды, – деп хабарлайды aqshamnews.kz тілшісі.
Алматының Медеу ауданында атмосфералық ауаны қорғау және жаңа экологиялық талаптарға қатысты кәсіпкерлермен ақпараттық-консультациялық кеңес өтті. Кездесуге аудан әкімдігі, қалалық Экология және қоршаған орта басқармасы, жауапты басқармалар мен бизнес өкілдері қатысты.
Кездесуді ашқан Медеу ауданының әкімі Еркебұлан Оразалин кеңестің негізгі мақсаты — кәсіпкерлерге жаңа экологиялық талаптарды түсіндіріп, оларды кезең-кезеңімен әрі түсінікті түрде енгізуді қамтамасыз ету екенін атап өтті.
«Әңгіме бизнесті жабу немесе қысым көрсету туралы емес. Біздің мақсат – кәсіпкерлерге жаңа нормалардың мәнін түсіндіріп, айыппұлдар мен тәуекелдердің алдын алу үшін қандай қадамдар жасау қажет екенін дер кезінде жеткізу», — деді Еркебұлан Оразалин.
Кездесу барысында қатысушыларға Алматыдағы атмосфералық ауаның қазіргі жағдайы туралы ақпарат ұсынылды. Мамандардың мәліметінше, Алматы агломерациясындағы жалпы шығарындылар көлемі жылына 225 мың тонна болады, оның 189 мың тоннасы тікелей Алматы қаласына тиесілі.
Қалада экологиялық ахуалды жақсартуға бағытталған бірқатар жүйелі шаралар қолға алынғаны айтылды. Қазіргі таңда Алматыдағы жеке секторды газдандыру деңгейі 99,4 пайызға жеткен. Сонымен бірге 2-ЖЭО мен 3-ЖЭО-ны газға көшіру жұмыстары жалғасып жатыр. Бұл зиянды шығарындылар көлемін 92 пайызға дейін қысқартуға мүмкіндік береді.
Бұдан бөлек, қоғамдық көлік паркін жаңарту жұмыстары жалғасуда. 2024 жылдан бастап Алматыда қалалық маршруттар үшін дизельді автобустар сатып алу тоқтатылды. Соңғы жылдары қала үшін 2,9 мыңнан астам экологиялық автобус сатып алынған.
Автокөлік шығарындыларын бақылау да күшейтілген. Қазіргі уақытта Алматыда ауа сапасын бақылайтын 19 стационарлық экобекет пен 4 мобильді зертхана жұмыс істейді.
Кездесу аясында кәсіпкерлерге 2025 жылы 30 желтоқсанда қалалық мәслихат бекіткен атмосфералық ауаны қорғаудың жаңа қағидалары таныстырылды. Құжатта төмен шығарындылар аймақтарын (LEZ) енгізу, бизнес нысандары мен автокөлікке қойылатын жаңа талаптар, сондай-ақ экологиялық бақылауды күшейту қарастырылған.
2026 жылы сәуір айынан бастап қаланың орталық бөлігінде пилоттық LEZ-аймақ жұмыс істеп келеді. Ал 2027 жылдан бастап бұл талаптарды Алматының бүкіл аумағына кезең-кезеңімен енгізу жоспарланып отыр.
Жаңа экологиялық талаптар қоғамдық тамақтану орындарына, техникалық қызмет көрсету станцияларына, коммерциялық моншаларға және III санаттағы өзге де нысандарға қатысты болады. Олар үшін сүзгілер мен тазарту жүйелерін орнату, экологиялық таза отын түрлеріне көшу және шығарындыларды тұрақты өлшеу міндеттеледі.
Медеу ауданы аумағында атмосфералық ауа сапасына әсер ететін 249 қоғамдық тамақтану орны, коммерциялық монша және техникалық қызмет көрсету станциясы орналасқан.
Сондай-ақ, кәсіпкерлерге жабдықтарды жаңғырту мен шығарындыларды тазарту жүйелерін орнатуға арналған жеңілдетілген қаржыландыру бағдарламалары туралы да ақпарат берілді.
Кездесу соңында аудан әкімі экологиялық мәселелерді шешу қала билігі мен бизнестің бірлескен әрекеті арқылы ғана жүзеге асатынын айтты.
«Жаңа талаптарды шектеу ретінде емес, бизнесті жаңғыртуға, оның тұрақтылығын арттыруға және тұрғындардың сенімін күшейтуге мүмкіндік ретінде қабылдау қажет. Аудан әкімдігі мұны қолдауға, кеңес беруге және шешім табуға көмектесуге дайын», — деп сөзін түйіндеді Еркебұлан Оразалин.