Алматы қаласын цифрландыру.
Бұл жайында қала әкімі Ерболат Досаевтың қатысумен өткен мәслихат сессиясында Алматы қаласының 2023-2025 жылдарға арналған бюджет жобасын қарау барысында айтылды, деп хабарлайды Almaty-akshamy.kz.
Қазіргі уақытта қалалардың бәсекеге қабілеттілігін анықтаудағы негізгі критерийлердің бірі оны цифрландыру деңгейі болып табылады.
Негізгі жоба Алматы қаласының «цифрлық егізін» енгізу болып табылады. Ол барлық Смарт-сити жобаларын ортақ платформаға біріктіріп, Бірыңғай деректер қоймасын дамытуы тиіс.
Бұл жоба коммуналдық қызметтер, мемлекеттік органдар және басқа да жеке компаниялардың деректерін дұрыс интеграциялау арқылы қаланы басқару сапасын және азаматтардың өмір сүру сапасын жақсартуға мүмкіндік береді. Бірінші кезеңді 2023 жылы іске қосу жоспарланып отыр, оған 956 млн. теңге қарастырылған.
«2023 жылы тұрғындар үшін қосымша проактивті сервистерді іске қосуды ойластырып отырмыз. Жыл соңына дейін адамдар көп жиналатын орындарда 3 050 бейнекамера, аулалар мен подъездерде 4 244 бейнекамера орнатылады (0,8 млн. теңге).
Сондай-ақ бүгінде синтетикалық есірткі таратушылар арасында белгілі Кеңсай шағын ауданында қосымша 223 бейнекамера орнатылады», - деді қала әкімі Ерболат Досаев.
Жол қозғалысында қауіпсіздікті қамтамасыз ету үшін 2023 жылдың сәуіріне қарай желілік учаскелер мен қиылыстарда қосымша 575 Сергек орнату жобасы (3,3 млрд. теңге) аяқталады.
Тұрғындар қаланың кез келген жерінде өздерін қауіпсіз және жайлы сезінуі үшін келесі жылы мемлекеттік-жекешелік әріптестік аясында адамдар көп жиналатын орындарға қосымша 6 000 бейнекамера орнату жоспарлануда.
Қалалық бейнебақылау камераларынан алынған жазбаларды орталықтан басқару және видеоларды талдау үшін олар Бірыңғай бейнемониторинг жүйесінде жинақталады, оған 1,2 млрд. теңге көзделген.