Интернет арқылы есірткі сатып, оларды аймақ ішінде жасырумен айналысу үрдісі – өзекті мәселелердің бірі, деп хабарлайды Almaty-akshamy.kz Polisia.kz-ке сілтеме жасап.
«Жыл басынан бері осы қылмыстық әрекет бойынша 43 есірткі сатушы әшкереленіп, оқиға орнында ұсталды. Мысалы, жедел іздестіру іс-шаралары барысында біздің бөлімше қызметкерлері жоғары оқу орындарының бірінде оқитын 19 жастағы студентті ұстады. Одан синтетикалық есірткі заты бар 25 полиэтилен бумасы тәркіленді. Сонымен қатар, ойын-сауық мекемелерінде есірткіні пайдалану мен өткізу деректерін анықтау бойынша іс-шаралар тұрақты түрде жүргізілуде. Осыған дейін мақсатты іс-шаралардың нәтижесінде түнгі клубтардың бірінде есірткі сатумен айналысқан 21 жастағы бармен ұсталып, оның жұмыс орны мен тұрғылықты жерінде “синтетика” тәркіленгені туралы хабарлаған болатынбыз. Осындай арнайы іс-шараларды қаладағы екі үлкен мейрамханада жасадық. Онда аспаздар есірткі сатумен айналысқан. Олар қамауға алынды», – деп хабарлады Алматы қалалық ПД Есірткі қылмысына қарсы күрес басқармасының бастығы Ерлан Әлмағамбетов.