Бүгін Алматыда «AMANAT» партиясы қалалық филиалы жанындағы «Жастар Рухы» жастар қанатының кезектен тыс VIII есеп беру-сайлау конференциясы өтті. Бұл туралы Aqshamnews.kz сайты хабарлайды.
Жиында ұйымның өткен кезеңдегі қызметі қорытындыланып, алдағы басым бағыттар айқындалды. Қатысушылар жастар саясаты, көшбасшылықты дамыту, еріктілік қозғалысын нығайту, сондай-ақ жастардың әлеуметтік-экономикалық мәселелерін шешу жолдарын талқылады.
Конференция делегаттарының ашық дауыс беруі нәтижесінде Ділдәбек Дидарбек Жұмағалиұлы «Жастар Рухы» Алматы қалалық филиалының жаңа төрағасы болып сайланды. Өз сөзінде ол жастар саясатын дамытуға қатысты көзқарасын білдіріп, ұйым жұмысын одан әрі жандандыруға ниетті екенін айтты.
Іс-шараға қатысқан «Жастар Рухы» жастар қанатының төрағасы Ақерке Искандерова жаңа сайланған төрағаға сәттілік тілеп, алдағы жұмыстарды айқындап, бірқатар нақты тапсырмалар берді.
Алдағы уақытта «Жастар Рухы» жастар бастамаларын қолдап, олардың қоғамдық өмірге белсенді араласуына жағдай жасауға бағытталған жұмыстарын жалғастырады.