Алматы қаласындағы №118 мектеп-гимназиясында Ұлттық ұланның тағы да бір «Жас бүркіт» әскери-патриоттық сыныбы ашылды. Іс-шара барысында полковник Мақсат Баймағұлов басшылық ететін Бауыржан Момышұлы атындағы 5571 әскери бөлімі мен мектеп-гимназия арасында ынтымақтастық орнату туралы меморандумға қол қойылды. Аталған іс-шара Ұлы Отан соғысындағы Жеңістің 80 жылдығы қарсаңында өткізіліп жатқан «Жеңіске 100 күн қалғанда» акциясы аясында ұйымдастырылды, деп хабарлайды aqshamnews.kz
№118 мектеп-гимназиясының оқушылары алғаш рет «Жас бүркіт» әскери-патриоттық қозғалысына мүше болды. Мүшелікке 3 «З» сыныбының 36 оқушысы толық өтті. Олар «Жас бүркіт» антын қабылдады.
5571 әскери бөлімінің өкілдері жаңа құрылған «Жас бүркіт» сыныбына «Жас бүркіт» әскери-патриоттық қозғалысының туын, арнайы эмблемасы, береті мен банданын табыстады. Сондай-ақ, бөлімнің әскери оркестрі мен мектеп оқушылары бірлесіп концерттік бағдарлама ұсынды.
2023 жылы өткен Бүкілармиялық Кеңесте Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев өскелең ұрпақтың әскери-патриоттық рухын көтеруге баса мән беру қажеттігін және батырларымыздың ерлігін үнемі дәріптеп отыру керектігін атап өткен еді.
Айта кетсек, Ұлттық ұланның «Жас бүркіт» әскери-патриоттық қозғалысы 2003 жылы Шымкентте құрылған. Бүгінде еліміздің барлық қаласында бар.