Алматыда қаңтар оқиғасынан кейін шағын және орта бизнестің қызметі толығымен қалпына келтірілді. ШОБ субъектілеріне 16 млрд теңгеден астам қаражат төленді. Бұл туралы Өңірлік коммуникациялар қызметінің брифингінде Алматы қаласы әкімінің орынбасары Әлішер Әбдіқадыров айтты.
«Даму» кәсіпкерлікті дамыту қорымен бірлесіп, «Almaty Business» өңірлік бағдарламасы аясында «Jana Business» жаңа қосалқы өнім құрылды. Оны іске асыруға 5 млрд. теңге қарастырылған. Жеңілдетілген несиелер бойынша мөлшерлеме 7% -дан 6%-ға дейін төмендетілді. Несиенің ең жоғары сомасы – 100 млн.теңге, несиелеу мерзімі - 7 жылға дейін», - деді Әлішер Әбдіқадыров.
Сауда операцияларының тиімділігін арттыру мақсатында «Jana Business» бағдарламасымен жылдық мөлшерлемесі 8,5% бойынша факторингтік мәмілелерді қаржыландыру мүмкіндігі қарастырылады.
Шағын және орта бизнесті дамытуды ынталандыру бойынша қабылданған шаралардың арқасында биылғы І жартыжылдығының қорытындысы бойынша ШОБ-тың Алматы экономикасындағы үлесі 60,3%-ға дейін өсті.