Алматыда жалған шот-фактураларды пайдалану арқылы мемлекетке 686 миллион теңге көлемінде залал келтірген ұйымдасқан қылмыстық топ мүшелеріне сот үкімі шықты, - деп хабарлайды Aqshamnews.kz.
Бұл туралы қала прокуратурасы хабарлады.
Тергеп-тексеру барысында анықталғандай, бір топ адам тауарлар мен қызметтерді нақты орындамастан, жалған шот-фактураларды рәсімдеу арқылы салық төлемінен жалтару схемасын ұйымдастырған. Қылмыстық әрекетті жасыру мақсатында олар жалған біріктіру рәсімдерін жүргізіп, формалды түрде тіркелген серіктестіктерді кейіннен жойған.
Аталған заңбұзушылықтар Сотқа дейінгі тергеп-тексерулердің бірыңғай тізілімінде тіркелген. Қала прокуратурасының қадағалау шаралары нәтижесінде заңсыз біріктіру әрекеті тоқтатылды.
Алматы қаласының соты топтың алты қатысушысын ҚР Қылмыстық кодексінің:
- 216-бабы – (Шот-фактураларды, есеп-фактураларды жалған жасау)
- 262-бабы – (Ұйымдасқан қылмыстық топты құру және оған басшылық ету) бойынша кінәлі деп таныды.
Сот үкіміне сәйкес, әрбір сотталушы қылмыстың ауырлығына байланысты 6 жылдан 8 жылға дейін бас бостандығынан айырылды.