Алматыда 25 жастағы Ерзат Егізбайдың жоғалуына қатысты жаңа деректер белгілі болды, деп хабарлайды Aqshamnews.kz тілшісі Tengrinews.kz-ке сілтеме жасап.
Ерзат құрылыс нысанында геодезистің көмекшісі болып жұмыс істеген. Жақындарының айтуынша, оның жұмыста да, үйде де ешкіммен келіспеушілігі болмаған.
19 мамыр, сейсенбі күні ол әдеттегідей жұмысқа кеткен, алайда үйіне қайтып оралмаған. Туыстарының сөзінше, Ерзат күндізгі сағат 14:00 шамасында басшысынан дүкенге сұранып шыққан. Кейін автобусқа отырып, Еңбекшіқазақ ауданындағы Космос ауылы бағытына кеткені анықталған. Оның телефоны соңғы рет сол маңда қосулы болған. Қазір ұялы байланыс құрылғысы өшірулі.
Жоғалған азаматтың жұбайы Ерзаттың бұған дейін ешқашан ескертусіз үйден кетпегенін айтады. Ол қылмыстық жауапкершілікке тартылмаған, есепте тұрмайды.
Анасы Талшы Құсайынованың айтуынша, Ерзат Райымбек даңғылындағы метроға түсіп, кейін қарсы бетке шығып, айналасына қараған. Бұл сәт бейнебақылау камерасына түсіп қалған. Анасының сөзінше, ол біреуді іздегендей әсер қалдырған.
«Ол ішімдік ішпейтін, темекі шекпейтін, бес уақыт намаз оқитын. Деструктивті діни ағымдарға қатысы жоқ. Ерзатты көрген немесе қандай да бір ақпарат білетін жандар болса, бізбен байланысуын сұраймыз. Телефон: 8 771 400 77 76», – деді жоғалған азаматтың анасы.
Қазір Ерзатты туыстары, еріктілер мен полиция іздестіріп жатыр.